ასპინძაში საპატიო მოქალაქე და ღვაწლმოსილი მოქალაქეები შეარჩიეს

ასპინძის საპატიო მოქალაქე გიორგი წითლანაძე გახდა. მას ასპინძის გამგეობამ სპეციალური სიგელი და მედალი გადასცა.

გიორგი წითლანაძე, თითქმის ნახევარი საუკუნის განმავლობაში, ასპინძაში, სხვადასხვა თანამდებობებზე მუშაობდა.

"აქ რომ ჩამოვედი, ასპინძა პატარა სოფელი იყო, პატარა ორღობეებით. პირველად მე გავატარე ასფალტი ასპინძაში. ხშირად მეუბნებიან, მემუარები დაწერეო, დავწერ აუცილებლად", – ამბობს 80 წლის გიორგი წითლანაძე, რომლისთვისაც სტატუსი მოულოდნელი და სასიხარულო აღმოჩნდა: "დიდად საპატივცემულოა, დიდი მადლობა მინდა ვუთხრა მას, ვისაც პირველს გაახსენდა, ვინ ააშენა და გაამშვენა ასპინძა და გავახსენდი მე. დიდი მადლობა ყველას. ეს არის უდიდესი პატოვოსცემა არამხოლოდ ჩემთვის, ჩემი შთამომავლობისთვისაც", – ამბობს იგი.

ასპინძის გამგებლის ლევან ცაბაძის განმარტებით, საპატიო მოქალაქე სპეციალურმა კომისიამ შეარჩია: "გიორგი წითლანაძემ 50 წელი შეალია ასპინძის განვითარებას. ის იყო აღმასკომის თავმჯდომარე, რაიკომის მდივანი, გამგებელი, დეპუტატი და ა.შ. საპატიო მოქალაქე კომისიურად შეირჩა, ყველა მონაწილეს დაევალა სამ–სამი სახელის ჩამოწერა და შეირჩა ხმათა უმრავლესობით".

დღესვე, ფოლკლორის დამსახურებულ მოღვაწებად დაასახელეს – შაქრო ნარიმანიძე და თემურ ზაზაძე; გარდა ამისა, დაასახლეელს სხვადასხვა პროფესიის 15 ადამიანი, რომელთაც ასპინძის ღვაწლმოსილი მოქალაქეების სტატუსი ერგოთ. მათ მადლობის სიგელები მიიღეს.

მადლობის სიგელები ასპინძის მუნიციპალიტეტმა სამცხე–ჯავახეთის დანარჩენ მუნიციპალიტეტებსაც გადასცა, ფესტივალში შეტანილი წვლილისთვის.

შეგახსენებთ, დღეს ასპინძაში, რეგიონული ფოლკლორული ფესტივალი მიმდინარეობს, სახელწოდებით – „ფუძეობა", დევიზით – - დაუბრუნდი შენს ფუძეს!

რეგიონალური ფოლკლორული ფესტივალი „ფუძეობა“ კომპანია GeoTourist-ის სოციალური პროექტია (სახალხო დღესასწაული), რომლის მიზანი საქართველოს რეგიონალური კულტურის განვითარების ხელშეწყობა და მხარდაჭერაა. 2017 წელს, ფესტივალი „ფუძეობა“ საქართველოს რვა რეგიონში ჩატარდება, წელს მას პროექტი “CHECK IN GEORGIA”-ც შემოუერთდა. ფესტივალის პარტნიორია ასევე, „საქარათველოს ფოლკლორის სახელმწიფო ცენტრი“.

ფოლკლორული ფესტივალი ასპინძაში ასპინძის ომის ამსახველი მონუმენტური ძეგლის გახსნით დაიწყო. ძეგლი საზეიმოდ, სამცხე–ჯავახეთისა და კახეთის გუბერნატორებმა გახსნეს.

ფესტივალზე სპეციალურად მოწყობილ ფაცხებში სტუმრებს სამცხე–ჯავახეთის სამზარეულოს დაგემოვნება შეუძლიათ. აქვეა გამოფენები, სადაც ადგილობრივების მიერ დამზადებული სხვადასხვა ხელნაკეთი ნივთების დათვალიერებაა შესაძლებელი.

დასასრულს უახლოვდება რეგიონის ფოლკლორული ანსამბლებისა და ინდივიდუალური შემსრულებლების კონცერტიც.

18:00 საათზე ფესტივალს საქართველოს ფოლკლორის სახელმწიფო ცენტრის მიერ ორგანიზებული კონცერტი გააგრძელებს, 20:00 საათზე კი იქნება გალაკონცერტი: ნიაზ დიასამიძისა და 33ა–ს მონაწილოებით. ფესტივალს ფეიერვერკი დაასრულებს.











[ნინო ნარიმანიშვილი, ლუბა გიორგაძე, ასპინძა]