დაშბაშის კანიონამდე მისასვლელ გზას რეაბილიტაცია უტარდება

მთავარი → სიახლე, ეკონომიკა, საზოგადოება 02.08.2017

წალკის მუნიციპალიტეტში, მდინარე ქციის (ხრამის) ხეობაში მდებარე დაშბაშის კანიონამდე მისასვლელი გზის რეაბილიტაცია 10 აგვისტოს დასრულდება.

გზაზე, რომლის სიგრძეც 1,4 კმ-ია, სამუშაოების 40% უკვე შესრულებულია. პროექტის ღირებულება 372 ათასს ლარს შეადგენს.

დაშბაშის კანიონი წარმოადგენს მდ. ქციის (ხრამის) მიერ დაშბაშის ლავურ მაღლობზე, ვულკანოგენურ ქანებში ჩაჭრილ კალაპოტში გამომუშავებულ იშვიათი და ბიომრავლფეროვნებით გამორჩეულ კანიონისებურ ხეობას. იგი ზღვის დონიდან 1110-1448 მეტრზე მდებარეობს.

კანიონის ირგვლივ არსებული ეკოსისტემები საკმაოდ ღარიბია მცენარეული საფარით, ხოლო კანიონში არსებულ ციცაბო ფერდობებზე შეფენილი მცენარეულობა, თვალწარმტაცი ჩანჩქერები, სრულიად განსხვავებულ მიკროლანდშაფტს ქმნის მისთვის დამახასიათებელი მიკრო კლიმატით, თავისებური ფაუნით და ა.შ.

დაშბაშის კანიონზე, სადაც გზა, სამცხე–ჯავახეთიდანაც მიდის, ჯავახეთის გავლით, წელს განსაკუთრებული ხალხმრავლობაა. როგორც "მთის ამბებს" ალგეთის ეროვნული ტყე-პარკის რეინჯერმა განიცხადა, შაბათ-კვირას, კანიონს, საშუალოდ, 500-600-მდე ადამიანი სტუმრობს.