ასპინძიდან აშშ–ში – რატი ზედგინიძე ამერიკაში გასამგზავრებლად ემზადება

აშშ–ს ავერეტის უნივერსიტეტში, სადაც ასპინძელმა რატი ზედგინიძემ საავიაციო ფაკულტეტზე საპრეზიდენტო სტიპენდია მოიპოვა, სწავლა 25 აგვისტოდან დაიწყება. 17 წლის ახალგაზრდა შეერთებულ შტატებში სავარაუდოდ ორ თვეში გაემგზავრება.

ასპინძელი ახალგაზრდის წარმატებებსა და სამომავლო გეგმებზე „სამხრეთის კარიბჭე“ რატი ზედგინიძის მამას კობა ზედგინიძეს ესაუბრა.
როგორც მამა გვეუბნება, აშშ–ში გაფრენამდე რატის სხვასხვა პროცედურული საკითხები აქვს მოსაგვარებელი, ამიტომ, მედიასთან საუბარს ჯერ თავს არიდებს.

კობა ზედგინიძის თქმით, ოცნება, აშშ–ი ავიაციის ფაკულტეტზე ესწავლა და შემდეგ კარიერა შეექმნა, რატის ბავშვობიდან ჰქონდა. ოცნების ასრულებას კი ერთი წლის წინ შეუდგა. ამერიკის უნივერსიტეტების შესახებ ინფორმაცია მოიძია და იმისათვის, რომ გამოცდების ჩაბარება არ გასჭირვებოდა, ინგლისური ენის შესწავლა დაიწყო: "მხოლოდ ექვსთვენახევირიანი კურსი გაიარა, ესეც საკმარისი აღმოჩნდა იმისათვის რომ ტოეფელის გამოცდა ჩაებარებინა. საბოლოოდ შევძელით, რომ ავერეტის უნივერსიტეტს მიწვევა გაეკეთებინა".

მისივე თქმით, ავერეტის უნივერსიტეტის გარდა, ამერიკის კიდევ ხუთი უნივერსიტეტიდან მოუვიდათ დადებითი პასუხი, თუმცა დაფინანსებისათვის ყველაზე კარგი პირობები ამ უნივერსიტეტს ჰქონდა.

17 წლის ახალგაზრდას საავიაციო საქმიანობა მამამ შეაყვარა. კობა ზედგინიძეს მოსკოვში, ავიაციის ინსტიტუტი აქვს დამთავრებული.

„მფრინავი არ ვარ, მაგრამ ავიაციის შესახებ ტექნიკურ საკითხებზე დისერტაცია მაქვს დაცული. ყოველთვის ვუყვებოდი ავიაციაზე და ჩემს ნასწავლს ვუზიარებდი. თვითონაც გაუჩნდა სურვილი ესწავლა და პილოტის პროფესიისთვის დაეკავშირებინა ცხოვრება“, – გვეუბნება რატი ზედგინიძის მამა.

რატი ზედგინიძემ დაბა ასპინძის საჯარო სკოლა წელს დაამთავრა. იგი ამ სკოლის ერთადერთი მოსწავლეა, რომელიც აშშ–ს უნივერსიტეტში გააგრძელებს სწავლას.

ავერეტის უნივერსიტეტი (Averett University) 1859 წელს დაფუძნდა და ვირჯინიის შტატში, ქალაქ დენვილში მდებარეობს.



[ლუბა გიორგაძე, ასპინძა]