შავ ზღვაში სატვირთო გემი ჩაიძირა, დაკარგულებს შორის ერთ-ერთი საქართველოს მოქალაქეა

ფოტო: © unesdenizcilik.com

პანამის დროშის ქვეშ მცურავი სატვირთო გემი „გეროი არსენალა“, შავ ზღვაში, ქერჩის სრუტესთან, სავარაუდოდ, შტორმის შედეგად, ჩაიძირა. ამ დროისათვის ქერჩის სრუტესთან მასშტაბური სამაშველო ოპერაცია მიმდინარეობს.

სააგენტო „რია ნოვოსტის“ ინფორმაციით, ეკიპაჟის 12 წევრიდან ცხრა უკრაინის მოქალაქე იყო, ორი - რუსეთის, ერთი კი საქართველოს.

საზღვაო ტრანსპორტის სააგენტოს დირექტორის მოადგილემ, ვახტანგ მიქელაშვილმა ტელეკომპანია “იმედთან" საუბარში განაცხადა, რომ საქართველოს მოქალაქესთან დაკავშირებით დეტალები ზუსტდება: "საქართველოს მოქალაქე არის ეკიპაჟის ერთი წევრი, მაგრამ დასაზუსტებელია დეტალები მასთან დაკავშირებით".

პანამის დროშის ქვეშ მცურავ გემს სახელწოდებით “გეროი არსენალა” რუსეთის, აზოვის პორტიდან თურქეთის მიმართულებით მარცვლეული გადაჰქონდა.

„რია ნოვოსტის“ ინფორმაციით, სამაშველო სამუშაოებს უამინდობა ართულებს, ზღვაზე 4–ბალიანი შტორმია, ქარის სჩქარე კი წამში 20 მეტრს აღწევს. ადგილზე 140 მაშველი მუშაობს.

[sknews.ge]