თვითმმართველობის რეფორმა და მისი შედეგები–დღეს ახალციხეში დისკუსია გაიმართება

შეხვედრაში მონაწილეობას მიიღებენ სამოქალაქო საზოგადოების ადგილობრივი თვითმმართველობის, ხელისუფლების საკანონმდებლო შტოს წარმომადგენლები, აგრეთვე თვითმმართველობის ექსპერტები: მაგდა პოპიაშვილი, საქართველოს მედია კლუბის თავმჯდომარე და ირაკლი მელაშვილი, ექსპერტი თვითმმართელობის საკითხებში, რომლებიც წარმოადგენენ არგუმენტებს დეცენტრალიზაციის უპირატესობებსა და გამოწვევებზე: არჩევითობა და მისი პოლიტიკური სიძლიერე, ოპტიმიზაცია თუ მეტი თვითმმართველი ქალაქი.

შეხვედრის მიზანია საზოგადობის ჩართულობის გაზრდა დისკუსიაში თემაზე, თუ რა მიღწევები აქვს თვითმმართველობის რეფორმას, რა მოლოდინები გააჩინა თვითმმართველობის კოდექსმა და როგორ უპასუხა საქართველოს ხელისუფლებამ ამ მოლოდინებს.

ადგილობრივი თვითმმართველობის რეფორმა საქართველოს ხელისუფლებამ 2013-2014 წლებში განახორციელა. რეფორმა მიზნად ისახავდა ადგილობრივი თვითმმართველობის უფლებამოსილებებისა და ფინანსური დამოუკიდებლობის გაზრდას, გადაწყვეტილების მიღების პროცესში ადგილობრივი მოსახლეობის მეტ ჩართულობასა და ადგილობრივი თვითმმართველობის ორგანოთა მეტად დეცენტრალიზებას.

2014 წლიდან თვითმმართველი ქალაქების რიცხვს ახალციხეც შეემატა. თუმცა, მიმდინარე წელს საუბარი დაიწყო 7 ქალაქისთვის თვითმმართველის სტატუსის მოხსნაზე და ამ ქალაქებს შორისაა ახალციხეც.

[sknews.ge]