აბის სადავო ნაკვეთების შესწავლას საპატრიარქო იწყებს

აბის დასახლებაში მცხოვრებმა ვენერა ივანიძემ, საქართველოს საპატრიარქოს მიწის საკუთრების დამადასტურებელი დოკუმენტაცია სამშაბათს, 4 აპრილს გადაუგზავნა.

როგორც იგი ამბობს, ყველა დოკუმენტი, რაც მას აქვს, ადასტურებს, რომ საქართველოს საპატრიარქოზე საჯარო რეესტრში რეგისტრირებული 10 მეასედი, მისი საკუთრებაა.

ვენერას მსგავსად, საპატრიარქოში დოკუმენტების გადაგზავნას გეგმავს დანარჩენი მოსახლეობაც, ვისაც მსგავსი პრობლემა აქვს.

„თუ ეს დადასტურება, ჩვენ მივიღებთ სამართლიან გადაწყვეტილებას. ადრე არ იყო ელექტრონული რეგისტრაცია, მას შემდეგ, რაც საკადასტრო აზომვითი ნახაზების მოზადება დაიწყო, გადაფარვები მოხდა“, – განმარტავს საპატრიარქოს იურისტი ედიშერ ქარჩავა.
მისივე თქმით, გადაფარვის გამო, მსგავსი პრობლემები არა მარტო საპატრიარქოში, არამედ ყველგანაა.

„ორი გზა არის, ან ჩვენ ვღებულობთ გადაწყვეტილებას, ან მოქალაქეს სასამართლოში მისვლას ვურჩევთ, რადგან ხშირად მოქალაქე მოქალაქისგან ყიდულობს მიწას, სინამდვილეში ის სახელმწიფოს საკუთრებაა და უკანონო ქმედებას აქვს ადგილი“, – ამბობს ედიშერ ქარჩავა.
შეგახსენებთ, რომ ახალციხეში, აბის დასახლებაში მცხოვრები 12 ოჯახი აცხადებს, რომ მათი კუთვნილი ნაკვეთები, რომელიც 1992 წელს მიწის რეფორმის დროს გადაეცათ, საპატრიარქოს საკუთრებაში აღმოჩნდა. ამის შესახებ კი მოგვიანებით გაიგეს.

აბელებს საკუთრების დაბრუნებაში დახმარებას სტავაზობს „ტოლერანტობისა და მრავალფეროვნების ინსტიტუტიც “.

შეგახსენებთ, ახალციხეში, აბის დასახლებაში მცხოვრებთა ნაწილი საპატრიარქოს მათი კუთვნილი მიწის მისაკუთრებაში ადანაშაულებს. აბელები ნაკვეთებს ამუშავებენ, თუმცა, მხოლოდ მცირე ნაწილმა იცის, რომ მათი მიწები, ოფიციალურად, საპატრიარქოს კუთვნილებაშია.

[თინათინ ზაზაძე, ახალციხე]