'ერთი წიგნით გამთბარი გული' – ემიგრანტებს ქართულ წიგნებს გაუგზავნიან

კამპანია„ახალგაზრდა იურისტთა ასოციაციის”, საქართველოს ეროვნული ბიბლიოთეკისა და ორგანიზაცია "ჟურნალისტთა ქსელი გენდერული თანასწორობისათვის" ორგანიზებითა და ევროკავშირის მხარდაჭერით იწყება.

“ვერანაირი მატერიალური კეთილდღეობა ვერ გადაწონის იმ სულიერ ტკივილს, რასაც ემიგრანტი განიცდის. ვისაც არასოდეს უტარებია ემიგრანტობის ტვირთი, მისთვის ძნელია გულთან ახლოს მიიტანოს ის პრობლემები, რაც უცხოობაში მყოფ ადამიანს სამშობლოს მიტოვებისთანავე ექმნება. ამ სიტყვებს ათასობით ემიგრანტი ქართველისგან ვისმენთ და ვწუხვართ ხოლმე, რომ მათთვის შესაბამისი დახმარების გაწევა ხშირ შემთხვევაში, არ შეგვიძლია. თუმცა, თუკი მოვინდომებთ, აღმოვაჩენთ, რომ ჩვენი ელემენტარული, უმნიშვნელო ქმედებით, შეგვიძლია მათი მხარდაჭერა და თანადგომა“, – ვკითხულობთ განცხადებაში, რომელიც ორგანიზაციების სახელით უკვე გავრცელდა სოციალურ ქსელში.

ორგანიზატორების თქმით, საზღვარგარეთ მყოფ ქართველ ემიგრანტებს უამრავ პრობლემასთან ერთად, ერთი, ჩვენთვის მარტივად მოსაგვარებელი პრობლემაც აქვთ - არ აქვთ ქართული წიგნები და ბიბლიოთეკა: „ჩვენ კი შეგვიძლია, რომ ჩვენგან გაგზავნილი ერთი წიგნით და სიტყვით ბევრ ჩვენგან შორსმყოფ ადამიანს გავუთბოთ გული. მოვინდომოთ და ერთად შევქმნათ წიგნის ბანკი ემიგრანტებისთვის“.

კამპანიას „წიგნები საქართველოდან“, სურვილის შემთხვევაში ნებისმიერი მოქალაქე შეუერთდება. ამისთვის, მხოლოდ ერთი წიგნი და სურვილია საჭირო. ახალციხეში კამპანიას „ახალციხის გენდერის მედიაცენტრი“ ხელმძღვანელობს.

მსურველებმა, ცენტრში, რომლის მისამართია, ახალციხე, დიდიმამიშვილის ქუჩა, N16, ("სამხრეთის კარიბჭეს" რედაქცია) უნდა მოგვიტანოთ გასაგზავნი წიგნი და მოკლე აღწერა, თუ რატომ არის თქვენთვის ღირებული ესა თუ ის წიგნი და რატომ უგზავნით ამ წიგნს ემიგრანტებს. მის გაგზავნას ჩვენ უზრუნველვყოფთ.

კამპანიის ფარგლებში, იქმნება ფოტო-გალერეაც - თქვენი წიგნი, სელფით, აღწერითურთ, კამპანიის გვერდზე (https://www.facebook.com/events/1226990587417970/) განთავსდება, ჰეშთეგით: #წიგნებისაქართველოდან

[sknews.ge]