ინციდენტი ახალქალაქში პატრულის მიერ მძღოლის დაჯარიმების გამო [Video]

შემთხვევა ახალქალაქში დღეს, 29 მარტს, დაახლოებით 13:00 საათზე მოხდა. Jnews.ge–ს ჟურნალისტის ქრისტინა მარაბიანის ინფორმაციით, პატრულის ეკიპაჟმა ერთ–ერთ ახალგაზრდას ჯარიმა ღვედის არქონის გამო დაუწერა, თუმცა, მძღოლი ირწმუნება, რომ ღვედი ეკეთა და ჯარიმას არ იმსახურებდა.

ჟურნალისტის თქმით, მძღოლს თვითმხილველებიც ჰყავს, რომლებიც ამბობენ, რომ ახალგაზრდას ღვედი ნამდვილად ეკეთა. თუმცა, საპირისპიროს აცხადებს საპატრულო პოლიციის ეკიპაჟი.



პატრულის ეკიპაჟსა და მძღოლის შელაპარაკების გამო, შემთხვევის ადგილზე მალევე მოქალაქეები შეიკრიბნენ, რამაც ქალაქის ცენტრში მოძრაობა შეაფერხა. შეკრებილი მძღოლები ამბობდნენ, რომ პატრული მათ ხშირად აჯარიმებს დაუმსახურებლად.

მოლაპარაკებების შემდეგ, დაჯარიმებული მძღოლი და პატრულის თანამშრომელი შეთანხმდნენ, რომ ამბის გასარკვევად საპატრულო პოლიციის მანქანის ვიდეოთვალის ჩანაწერი ნახონ.




„შეთანხმდნენ, რომ თუ აღმოჩნდება, რომ მძღოლს ღვედი ეკეთა, პატრული ბოდიშს მოიხდის. თუ ასე არ იყო, მაშინ ახალგაზრდა გადაიხდის ჯარიმას“, – ამბობს ქრისტინა მარაბიანი.

მისივე ინფორმაციით, ამ შეთანხმების შემდეგ ახალქალაქში შეკრებილები დაიშალნენ. ჟურნალისტის თქმით, ეს მსგავსი ხალხმრავლობის პირველი შემთხვევა არ არის, ბოლო პერიოდში ასეთი ინციდენტები ახალქალაქში ხშირად ხდება.



საქართველოს შინაგან საქმეთა სამინისტროში მძღოლის ადმინისტრაციული წესით დაჯარიმებას ადასტურებენ.ნახეს თუ არა ვიდეოკამერის ჩანაწერი, შეთანხმებისამებრ, ამაზე შინაგან საქმეთა სამინისტროში ინფორმაცია არ აქვთ. უწყებაში ამბობენ, რომ თუ მოქალაქე ფიქრობს, რომ ჯარიმას არ იმსახურებდა, შეუძლია გაასაჩივროს.




[sknews.ge]