ახალი ნაგავმზიდებით ნარჩენებს ახალციხის ყველა ქუჩიდან ვერ გაიტანენ

ახალციხის საკრებულოს სხდომაზე, იმ ახალი ნაგავმზიდების შესახებ ისაუბრეს, რომლებიც ჯერ შპს „კეთილმოწყობას“ არ გადასცემია.

როგორც სხდომაზე დეპუტატმა ახალციხის საკრებულოს საფინანსო–საბიუჯეტო, ეკონომიკისა და ქონების მართვის საკითხთა კომისიის თავმჯდომარემ შოთა ნასყიდაშვილმა განაცხადა, ახალ ნაგავმზიდებთან დაკავშირებით ბიუროს სხდომაზე ვრცლად ისაუბრეს,მიზეზი კი ის იყო, რომ აღნიშნულ სხდომაზე „კეთილმწოყობის“ სამსახურის უფროსის დროებით მოვალეობის შემსრულებელი გიორგი ლონდარიძე ანგარიშს წარმოადგენდა.

„ბიუროს სხდომაზე ორი საათი გვქონდა ამ თემაზე პოლემიკა. კითხვები,რომლებიც გაჩნდა, ახალ მანქანებს ეხებოდა, – მოუხერხებელია და ვერ გამოვიყენებთო. გვაინტერესებს, რამდგენად შესაძლებელია რომ მათი გაცვლა მოხერხდეს, ან უფრო მცირე ზომის რომ ვიყიდოთ?“ – იკითხა სხდომაზე ნასყიდაშვილმა.

„ეს ვერ მოხერხდება“, – უპასუხა მას ახალციხის მერმა ვლადიმერ ზედგინიძემ.

მიუხედავად პასუხისა, ‘კეთილმოწყობის’ სამსახურის უფროსმა სცადა აეხსნა, რაში მდგომარეობს ახალი მანქანების გამოყენების სირთულე: „დიდი მანაქანა ცენტრალურ ქუჩებზე ვერ იმოძრავებს, ეს შეუძლებელია“.

„გადასარევად იმოძრავებს ყველაგან“, – თავის აზრზე დარჩა ზედგინიძე.

სხდომის დასრულების შემდეგ კი „სამხრეთის კარიბჭეს“ შეკითხვაზე, რატომ არ იქნა თავიდანვე გათვალისწინებული იმ ზომის და ისეთი მანქანების ყიდვა, რომლის გამოყენებაც ყველგან შეიძლებოდა, ზედგინიძემ გვიპასუხა: „ამის ყიდვა მოხდა ცენტრალიზებულად. ეს ეკოლოგიურად სუფთა მანქანებია, გამონაბოლქვი ნაკლები აქვთ, ამიტომ ორნაირი საწვავი სჭირდებათ. გვაქვს ორნაირი მანქანა ერთი 20 ტონიანია, მეორე 13–იანი. სადაც 20 ტონიანი ვერ მივა, იქ 13 ტონიანს გამოვიყენებთ“.

შეგახსენეთ, რომ ახალციხის მერიამ ნაგავმზიდები სესხით იყიდა. 521 814 ლარში მას გარდა ორი ნაგავმზიდისა ახალი ურნებიც ექნება.

[თამუნა უჩიძე, ახალციხე]