მართლმადიდებელი ეკლესია ავტოკეფალიის აღდგენის დღეს აღნიშნავს

1917 წლის 12 (25) მარტს ქართველმა სამღვდელოებამ ქართული ეკლესიის ავტოკეფალიის აღდგენის დოკუმენტი მიიღო, სექტემბერში კი კვლავ აირჩია კათოლიკოს-პატრიარქი. 106 წლიანი იძულებითი შუალედის შემდეგ, სრულიად საქართველოს სამოციქულო ავტოკეფალური მართლმადიდებელი ეკლესიის კათოლიკოს-პატრიარქი დიდი ქართველი საეკლესიო მოღვაწე, ავტოკეფალიისათვის დაუცხრომელი მებრძოლი, კირიონ II გახდა, რომელიც შემდგომ ვერაგულად მოკლეს მარტყოფის მონასტერში.

1990 წელს, სრულიად საქართველოს კათოლიკოს-პატრიარქის, ილია II-ის დიდი მცდელობით, მსოფლიოს საპატრიარქომ ოფიციალურად ცნო და აღიარა საქართველოს ეკლესიის ავტოკეფალურობა.

ავტოკეფალია ერთი ადგილობრივი ეკლესიის მეორესგან დამოუკიდებლობას ნიშნავს.

პირველი ავტოკეფალიური ეკლესიებირომის იმპერიასა და მის მეზობელ ქვეყნებში წარმოიქმნა. IV საუკუნეში შეიქმნა ოთხი ავტოკეფალიური ეკლესია: კონსტანტინოპოლის, ალექსანდრიის, ანტიოქიის, იერუსალიმის, მოგვიანებით ანტიოქიისას გამოეყო კვიპროსისა და ქართული ეკლესიები.

ამჟამად 15 ავტოკეფალიური მართლმადიდებლური ეკლესიაარსებობს: ალბანეთის, ალექსანდრიის, ამერიკის, ანტიოქიის, ბულგარეთის, საქართველოს, იერუსალიმის, კვიპროსის, კონსტანტინოპოლის, პოლონეთის, რუმინეთის, რუსეთის, სერბეთის, ჩეხეთის და ელადის (ბერძნული) ეკლესიები.


[sknews.ge]