25 მარტი საქართველოს მართლმადიდებელი ეკლესიის ავტოკეფალიის აღდგენის დღეა

ქართულმა ეკლესიამ ავტოკეფალია ანტიოქიის ეკლესიისგან 457 წელს მიიღო. რუსეთის იმპერიამ კი ეკლესიის დამოუკიდებლობა 1811 წელს გააუქმა. ავტოკეფალიის აღდგენამდე რუსეთის სინოდი ქართულ ეკლესიას ეგზარქოსების მეშვეობით ხელმძღვანელობდა.

ავტოკეფალიის აღდგენისთვის ბრძოლა ქართველმა საზოგადოებამ ილია ჭავჭავაძის, კირიონ საძაგლიშვილის, ლეონიდე ოქროპირიძის მეთაურობით დაიწყო.

1917 წლის 12 (25) მარტს ქართველმა სამღვდელოებამ ქართული ეკლესიის ავტოკეფალიის აღდგენის დოკუმენტი მიიღო, სექტემბერში კი კვლავ აირჩია კათოლიკოს-პატრიარქი. 106 წლიანი იძულებითი შუალედის შემდეგ, სრულიად საქართველოს სამოციქულო ავტოკეფალური მართლმადიდებელი ეკლესიის კათოლიკოს-პატრიარქი დიდი ქართველი საეკლესიო მოღვაწე, ავტოკეფალიისათვის დაუცხრომელი მებრძოლი, კირიონ II გახდა, რომელიც შემდგომ ვერაგულად მოკლეს მარტყოფის მონასტერში.

1990 წელს, სრულიად საქართველოს კათოლიკოს-პატრიარქის, ილია II-ის დიდი მცდელობით, მსოფლიოს საპატრიარქომ ოფიციალურად ცნო და აღიარა საქართველოს ეკლესიის ავტოკეფალურობა.

"ამ დღეს შედგა დიდი მოვლენა კონსტანტინეპოლში, საქართველოს ეკლესიას გადმოეცა ორი სიგელი - პატრიარქობის და ავტოკეფალიის", – განაცხადა საკვირაო წირვაზე საქართველოს პატრიარქმა ილია მეორემ.

[თაკო ფეიქრიშვილი, ახალციხე]