ადიგენელი მოჭიდავის მზადება ევროპის ჩემპიონატისთვის

საქართველოს ჩემპიონატი ბერძნულ–რომაულ ჭიდაობაში, რომელზეც, გოგა აფრიამაშვილმა, 71 კილოგრამ წონით კატეგორიაში, პირველი ადგილი დაიკავა, 14–15 თებერვალს გაიმართა.

25 წლის სპორტსმენმა ოთხი შეხვედრა ჩაატარა და ოთხივე წარმატებით დაასრულა. ოთხი შეხვედრიდან ორი შერკინება მსოფლიოს ჩემპიონებთან მოუხდა, საბოლოო გამარჯვების შემდეგ კი მზადება ევროპის ჩემპიონატისთვის დაიწყო.

„რამდენიმეთვიანი, მოსამზადებელი შეჯიბრებები გვაქვს, მათ შორის უკრაინაშიც. ვიმედოვნებ, რომ ახლა უკვე ევროპის ჩემპიონიც გავხდები და საქართველოს ნაკრებს ვასახელებ“, – ამბობს გოგა, რომელიც ერთადერთია სამცხე–ჯავახეთიდან, ვინც ეროვნული ნაკრების შემადგენლობაში მოხვდა.

გოგა ფიქრობს, რომ ევროპის ჩემპიონატზე გამარჯვება არ გაუჭირდება, რადგან სპორტის ამ სახეობაში საკმაო გამოცდილება დააგროვა.

გოგა აფრიამაშვილს სპორტის ამ სახეობისადმი ინტერესი ბავშვობიდან აქვს. მამა მოჭიდავე იყო, ამიტომ, თავადაც ჭიდაობა 8 წლის ასაკში დაიწყო. დამწყებ სპორტსმენს მამა ავარჯიშებდა,ჯერ თავისუფალი სტილი იტაცებდა, მოგვიანებით საცხოვრებლად დედაქალაქში გადავიდა და გადაწყვიტა თავისუფალი ჭიდაობის ნაცვლად, ვარჯიში ბერძნულ–რომაულ ჭიდაობაში გაეგრძელებინა.

„ჭიდაობის ეს სტილი უფრო მომეწონა. ბავშვობის ოცნებად მქონდა, ევროპისა და მსოფლიო ჩემპიონატებში მიმეღო მონაწილეობა“, – ამბობს და ამატებს, რომ სპორტის ამ სახეობას ბოლომდე გაჰყვება, – „ჩემი საქმიანობა ესაა“.

მის „ანგარიშზე“, წლების განმავლობაში, არაერთი, წარმატებით ჩატარებული შეხვედრაა, ორჯერ იყო საქართველოს ჩემპიონი, თუმცა, მაშინ ევროპაში გამართული შევედრები წარმატებული არ აღმოჩნდა. გოგას იმედი აქვს, რომ მესამე მცდელობა იღბლიანი აღმოჩნდება და სამშობლოში ევროპის ჩემპიონის ტიტულით დაბრუნდება. ჩემპიონატი მიმდინარე წლის მაისში ჩატარდება.

[ლუბა გიორგაძე, ადიგენი]