ადიგენელი ახალგაზრდა მსოფლიო რეკორდისათვის ემზადება [Photo/Video]

პირველი, მსოფლიო რეკორდის დასამყარებლად ლერი თუმანიშვილმა მზადება ოთხი თვის წინ დაიწყო. რეკორდის დამყარების ზუსტი დრო და ადგილი ჯერ არ იცის.

„ამ კვირაში ვარ დაბარებული, დროს შევათანხმებთ ფედერაციის პრეზიდენტთან და ამ კვირაშივე ვგეგმავ, მსოფლიო რეკორდი ოფიციალურად დავამყარო“, - ამბობს იგი.

ახალგაზრდა სპორტსმენი, მსოფლიო რეკორდს, 1 წუთში 33 აზიდვით დაამყარებს, ზურგზე მოკიდებული 19 კილოგრამიანი ჩანთით. ამბობს, რომ ვარჯიშის პროცესში 40 აზიდვა გააკეთა და იგივე რაოდენობის დაფიქსირებას გეგმავს რეკორდის დროს.

ლერი თუმანიშვილი თავისუფალი სტილით მოჭიდავეა. სპორტის ამ სახეობაში ხუთი წლის ასაკიდანაა ჩართული. ბოლო ორი წელია, სოფელ უდეში ჭიდაობის წრე აქვს შექმნილი და ადგილობრივ ახალგაზრდებს, თავისუფალ ჭიდაობაში ავარჯიშებს.

„ჩემს სოფელში არ იყო მსგავსი სავარჯიშო დარბაზი, სადაც სპორტის ამ სახეობას ადგილობრივები დაეუფლებოდნენ. გადავწყვიტე, ეს ყველაფერი თავად გამეკეთებინა და მსურველები მევარჯიშებინა“, - ამბობს იგი.

ცალ ხელზე აზიდვაში მსოფლიო რეკორდის დამყარების შანსის შესახებ ინფორმაცია, სოციალური ქსელიდან შეიტყო. ვიდრე, მსოფლიო რეკორდს დაამყარებს, გთავაზობთ ვიდეოს, რომელიც მან სპეციალურად „სამხრეთის კარიბჭეს“ გამოუგზავნა.



[ლუბა გიორგაძე, ადიგენი]