რით იყო გამორჩეული მირქმის დღესასწაული ახალქალაქში [Photo]

სომხეთის სამოციქულო ეკლესიის სამცხე-ჯავახეთის ეპარქიის წინამძღვარმა იერომონაზონმა ბაბკენ სალბიანმა და მამა ტატევ მარუკიანმა სურბ ხაჩის ეკლესიაში ახლადდაქორწინებულები დალოცეს, ეკლესიის ნათლულმა არტურ ფარმანიანმა კი მათ ბიბლია აჩუქა.

წირვის შემდეგ ეკლესიის ეზოში ტრადიციული კოცონი გაჩაღდა. იერომონაზონმა ბაბკენ სალბიანმა და კუმურდოელმა მიტროპოლიტმა ნიკოლოზმა ცეცხლი ერთად დაანთეს. უნდა აღინიშნოს, რომ ეს პირველი საეკლესიო ღონისძიებაა, რომელშიც საქართველოს მართლმადიდებლური და სამოციქულო ეკლესიების მაღალმა სასულიერო პირებმა ერთად მიიღეს მონაწილეობა.

კოცონის ირგვლივ ახალგაზრდებმა მრგვალი ცეკვა შესრულეს, იქვე მოწყობილ სცენაზე კი ანსამბლი „ჯავახეთი“ და ვაჩმანის კულტურის სახლის აღსაზრდელები გამოვიდნენ. საზეიმო ღონისძიებაზე პროექტ „სახალხო მომღერლის“ მონაწილეებმაც იმღერეს. ახლადდაქორწინებულები და ახალგაზრდები კოცონს გადაახტნენ და სურვილები ჩაიფიქრეს.

სომხური სამოციქულო ეკლესია მირქმას 14 თებერვალს, ნათლისღებიდან მეორმოცე დღეს აღნიშნავს. უფლის მირქმა იესო ქრისტეს მიწიერ ცხოვრებაში უმნიშვნელოვანეს მოვლენად მიიჩნევა. მოსეს კანონით, ქალს, რომელმაც მამრობითი სქესის შვილი გააჩინა, მშობიარობიდან 40 დღის განმავლობაში უფლის ტაძარში შესვლა ეკრძალებოდა. ამ ვადის გასვლის შემდეგ დედა ახალშობილთან ერთად მიდიოდა ტაძარში, რათა უფლისთვის სამადლობელი და განმწმენდი მსხვერპლი შეეწირა და მოძღვრისგან კურთხევა მიეღო. საეკლესიო წესდებით, დღესასწაულის წინ, 13 თებერვლის საღამოს ღვთისმსახურების მიწურულს ტარდება ანდასტანი - სამყაროს ოთხივე მხრის კურთხევის ცერემონიალი, რის შემდეგაც სანთლის კურთხევის ჯერი დგება.

უძველესი ტრადიციის თანახმად, ნაკურთხი სანთლით ინთება კოცონი, რომელიც ქრისტეს მხსნელ სინათლესთან სიმბოლიზდება. ხალხური ტრადიციის მიხედვით, ამ დღეს ახალგაზრდა ბიჭები და გოგონები კოცონის ალს უნდა გადაახტნენ.

ხალხში ანთებული კოცონი ასოცირდება ერთგვარ რიტუალთან, რომელიც განწმენდს და ბედნიერება მოაქვს ოჯახურ ცხოვრებაში.

[აღუნიკ აივაზიანი, ახალქალაქი]