2016 – 2017 სასწავლო წელს, სტუდენტთა სოციალური პროგრამის ფარგლებში, 853 სტუდენტს უმაღლესი სასწავლებლის საფასურს სახელმწიფო დაუფარავს.
სოციალური დაფინანსება რამდენიმე კატეგორიის სტუდენტებზე გაიცემა.
ა) გადასახადს არ გადაიხდის სტუდენტი, რომელიც ბოლო სამი წლის განმავლობაში მაღალმთიან და ეკოლოგიური მიგრაციის რეგიონში არსებულ ზოგადსაგანმანათლებლო დაწესებულებაში სწავლობდა. ამ კატეგორიაში სამცხე–ჯავახეთის მასშტაბით, დაფინანსებას ოთხ მუნიციპალიტეტში მცხოვრები ახალგაზრდები მიიღებენ:
ადიგენის მუნიციპალიტეტიდან – 15 სტუდენტი;
ასპინძის მუნიციპალიტეტიდან – 10 სტუდენტი;
ახალქალაქის მუნიციპალიტეტიდან – 10 სტუდენტი;
ნინოწმინდის მუნიციპალიტეტიდან – 6 სტუდენტი;
სამცხე–ჯავახეთის გარდა დაფინანსება მიიღო მესტიის, ლენტეხის, ონის, ქედის, ხულოს, შუახევის, ყაზბეგის, დუშეთის, წალკის, დმანისისა და ახმეტის მუნიციპალიტეტების სტუდენტებმაც.
ბ) დაფინანსებით ისარგებლებს კიდევ 170 სტუდენტი, რომლებიც ბოლო ორი წლის განმავლობაში სწავლობდნენ და სრული ზოგადი განათლების დამადასტურებელი დოკუმენტი მიიღეს ოკუპირებულ ტერიტორიაზე არსებულ სკოლებში. ასევე სტუდენტები, რომლებიც 2008 წლის 7 აგვისტომდე, ბოლო ერთი წლის განმავლობაში სწავლობდნენ ოკუპირებულ ტერიტორიაზე, ხოლო სრული ზოგადი განათლების დამადასტურებელი დოკუმენტი მიიღეს ოკუპირებული ტერიტორიის ფარგლებს გარეთ.
გ) კომუნისტური რეჟიმის დროს, სამცხე–ჯავახეთიდან დეპორტირებული მესხების შთამომავლები, 5 სტუდენტი.
დ) 15 სტუდენტი, რომლებიც ბოლო სამი წლის განმავლობაში სწავლობდნენ და სრული ზოგადი განათლების დამადასტურებელი დოკუმენტი მიიღეს აზერბაიჯანულენოვან ზოგადსაგანმანათლებლო დაწესებულებებში.
ე) 15 სტუდენტი, რომლებიც ბოლო სამი წლის განმავლობაში სწავლობდნენ და სრული ზოგადი განათლების დამადასტურებელი დოკუმენტი მიიღეს სომხურენოვან ზოგადსაგანმანათლებლო დაწესებულებებში.
ვ) 26 სტუდენტი, რომლებიც არიან საქართველოს ტერიტორიული მთლიანობისათვის ბრძოლებში დაღუპულთა და უგზო-უკვლოდ დაკარგულთა შვილები.
ზ) 50 სტუდენტი, რომლებსაც გარდაცვლილი ჰყავთ დედ-მამა.
თ) 100 სტუდენტი, რომლებიც არიან მრავალშვილიანი ოჯახის (ოთხი და მეტი შვილით) წევრები.
ი) 30 სტუდენტი, რომლებიც არიან მკვეთრად/მნიშვნელოვნად/ზომიერად გამოხატული შეზღუდული შესაძლებლობის მქონე პირები.
კ) 50 სტუდენტი, რომლებიც ბოლო სამი წლის განმავლობაში სწავლობდნენ და სრული ზოგადი განათლების დამადასტურებელი დოკუმენტი მიიღეს საქართველოს ოკუპირებულ ტერიტორიებთან გამყოფი ხაზის მიმდებარე სოფლებში არსებულ ზოგადსაგანმანათლებლო დაწესებულებებში.
ლ) 16 სტუდენტი, რომლებიც იმყოფებიან სახელმწიფო ზრუნვის ქვეშ (სააღმზრდელო საქმიანობის განმახორციელებელთან ან მინდობით აღზრდაში) ან გასული არიან სახელმწიფო ზრუნვიდან ბოლო სამი წლის განმავლობაში და იმყოფებოდნენ სახელმწიფო ზრუნვის ქვეშ მინიმუმ ორი წლის განმავლობაში.
მ) 170 სტუდენტი, რომლებიც რეგისტრირებულნი არიან სოციალურად დაუცველი ოჯახების მონაცემთა ერთიან ბაზაში და მათი ოჯახების სარეიტინგო ქულა ტოლი ან ნაკლებია 70 000-ზე.
ერთიანი ეროვნული გამოცდებით, უმაღლეს საგანმანათლებლო პროგრამებზე ჩარიცხული სტუდენტები ყოველწლიურად დაფინანსებას 2 250 ლარის ოდენობით მიიღებენ. პროგრამისათვის განათლებისა და მეცნიერების სამინისტროდან 1 920 000 ლარი გამოიყო.
[თაკო ფეიქრიშვილი, ახალციხე]