ბორჯომის პარკში შესვლის ფასი გაოთხმაგდა – ადმინისტრაციის განმარტებები

ბორჯომის ცენტრალურ პარკში გაზრდილმა ფასებმა მოსახლეობის უკმაყოფილება გამოიწვია, აღნიშნულთან დაკავშირებით პარკის ადმინისტრაციამ გუშინ, 11 იანვარს განცხადება გაავრცელა.

„როგორც მოგეხსენებათ, 2017 წლამდე ა.(ა).ი.პ. ბორჯომის ცენტრალური (ისტორიული) პარკის შემოსასვლელი ბილეთის ფასი განისაზღვრებოდა 0, 50 თეთრით, რაც ძალიან მცირეა, რომ ეს შემოსავალი მოხმარდეს პარკში მდებარე ინფრასტრუქტურის სრულ მოვლა-პატრონობას, ინფრასტრუქტურის გაუმჯობესებას, განახლებასა და აღდგენითი სამუშაოების უზრუნველყოფას, დამატებით დასუფთავებისა და გამწვანების სამუშაოების ჩატარებას, ადგილობრივი მოსახლეობისათვის, ტურისტებისა და ვიზიტორებისათვის გაჯანსაღების, დასვენების ეფექტური პირობების უზრუნველყოფას, საკურორტო ინფრასტრუქტურის შემდგომ გაფართოებას,სწორედ იმისათვის, რომ შევძლოთ აღნიშნული ამოცანების და მიზნების განხორციელება, პარკი საჭიროებდა ფასის გაზრდას, რათა მისი ფასი ახლოს მაინც ყოფილიყო ბილეთის რეალურ ღირებულებასთან“, – ნათქვამია განცხადებაში.

2017 წელს ააიპ–ი „ბორჯომის ცენტრალური პარკმა“, ბორჯომის მუნიციპალიტეტის გამგეობისგან სუბსიდიის სახით 169 000 ლარი მიიღო. ამ ეტაპისთვის ააიპ–ში 30 ადამიანი მუშაობს.

„ბორჯომის ცენტრალურ (ისტორიულ) პარკს იმისათვის, რომ სეზონს და არა მარტო სეზონს მომზადებული შეხვდეს სოლიდური თანხები სჭირდება. ყოველწლიურად პარკის რეაბილიტაციისათვის მრავალი ათასი იხარჯება, რაშიც შედის ატრაქციონების მომზადება სეზონისათვის, საბაღე სკამების სრული რეაბილიტაცია, გამწვანება- მცენარეების შეძენა და სხვა. ასევე სოლიდური თანხებია საჭირო პარკის კომუნალური გადასახადებისთვის და სხვა მიზნობრივი ხარჯებისთვის. ცნობისათვის, ბორჯომის ცენტრალური (ისტორიული) პარკი ბორჯომში , ქონების გადასახადის ერთ-ერთი მსხვილი გადამხდელია. გარდა ამისა ბორჯომის ცენტრალური (ისტორიული) პარკი ყოველწლიურად იღებს ბორჯომის მუნიციპალიტეტისაგან სუბსიდირებას, რადგან პარკის საკუთარი შემოსავლები არ ყოფნის პარკის სრულ შენახვა-რეაბილიტაციას. სწორედ ამიტომაა მიღებული ის გადაწყვეტილება, რაც ფასის მომატებას შეეხება“, – აცხადებენ ბორჯომის სიტორიულ პარკში.

ააიპ–ის ინფორმაციით პარკში შესვლა უფასო იქნება ბორჯომის მუნიციპალიტეტში მცხოვრები მოსახლეობისთვის, ასევე გადასახადისაგან სრულიად თავისუფლდებიან:

1. 8 წლამდე ბავშვები;
2. პენსიონერები;
3. შეზღუდული შესაძლებლობის მქონე პირები;
4. ომის ვეტერანები;
5. სოციალურად დაუცველები;
6. 50%-იანი ფასდაკლება ხორციელდება: 16 წლამდე მოზარდებსა და სტუდენტებზე.

[sknews.ge]