საფეხბურთო კლუბ ‘მესხეთს’ დაშლა ემუქრება

საქართველოს ფეხბურთის ფედერაციიდან, 50 000 ლარიანი დაფინანსების შესახებ, სამცხე-ჯავახეთის ფეხბურთის ფედერაციის პრეზიდენტს გელა მაისურაძეს უკვე ეცნობა თუმცა, გუნდმა „მესხეთმა“ შესაძლოა ეს თანხა ვერ მიიღოს, რადგან საქართველოს ჩემპიონატის გარდამავალ თამაშებში მონაწიელობის დავალიანება 2500 ლარის ოდენობით, ჯერ არ დაუფარავს.

„მესხეთის“ მწვრთნელი და სამცხე-ჯავახეთის ფეხბურთის ფედერაციის პრეზიდენტი გელა მაისურაძე ამბობს, რომ ფინანსური სახსრები არ გააჩნიათ.

ადგილობრივ ბიზნესმენებთან უშედეგო ცდის შემდეგ, გელა მაისურაძე დაფინანსების თხოვნით შეხვედრას ახალციხის მერთან ვლადიმერ ზედგინიძესთან აპირებს: „იმედი მაქვს, რომ ჩვენი ახალი მერის ინტერესი ფეხბურთის განვითარება იქნება და დახმარებაზე უარს არ გვეტყვის. ძლიერი და წარმატებული ფეხბურთელები ქალაქისთვისაც ძალიან მნიშვნელოვანია“.

საფეხბურთო კლუბ „მესხეთის“ პრობლემები ამით არ დასრულდება. მწვრთნელის განცხადებით, იმ შემთხვევაში თუ გუნდი მეორე ლიგამდე მიაღწევს, რომელიც მარტის თვიდან იწყება, მას უკვე ამ ლიგაში მონაწილეობის 8 000 ლარი ექნება გადასახდელი: „50 000 ლარიდან, ახალი სეზონის დაწყების ხარჯი რომ გავიღოთ, ადმინისტრაციული ხარჯების თანხები აღარ რჩება. ხელფასები და სხვა ხარჯებია გასასტუმრებელი. ძალიან ბევრი ვალები დაგროვდა“.

გარდა ამისა, მაისურაძის თქმით, გუნდმა მეორე ლიგაში წარმატებულად რომ ითამაშოს, სამი ახალი ფეხბურთელი უნდა შეიძინოს, რომლებიც უკვე შერჩეული ჰყავს. ამისთვის კი დამატებითი ხარჯებია საჭირო.

მიიღებენ თუ არა ახალციხელი ფეხბურთელები დაფინანსებას და გაგრძელებენ თუ არა საქართველოს ჩემპიონატში მონაწილეობას, გაურკვეველია. საქართველოს ჩემპიონატის პირველი ეტაპი ანუ გარდამავალი თამაშები უკვე დასრულებულია. სამცხე-ჯავახეთის ოთხი საფეხბურთო გუნდიდან, მეორე ლიგის საგზური სამმა: ახალქალაქის, ბორჯომისა და ახალციხის გუნდებმა მოიპოვეს. ნინოწმინდის გუნდი ჩემპიონთა ლიგას წაგებული თამაშების სიმრავლის გამო გამოეთიშა, ახალციხეში იმედი აქვთ, რომ ნინოწმინდის ბედს არ გაიზიარებენ და უფულობის გამო ჩემპიონატს არ გამოეთიშებიან.

[ლუბა გიორგაძე, ახალციხე]