"მტკვარი ჰესის" პროექტის პრეზენტაცია

ვიცე-პრემიერი ახალციხის მუნიციპალიტეტს რეგიონული განვითარებისა და ინფრასტრუქტურის მინისტრ ზურაბ ალავიძესთან და თანაინვესტირების ფონდის თავმჯდომარე გიორგი ბაჩიაშვილითან ერთად სტუმრობდა. პროექტის პრეზენტაციას ასევე, ადგილობრივი ხელისუფლებისა და კერძო სექტორის წარმომადგენლები ესწრებოდნენ.

„ჩვენი ვალია, ჩვენი აღებული ვალდებულებაა, საქართველოს სწრაფი ტემპით განვითარება. ისეთი პროექტების განხორციელება და დაფინანსება, რომელიც ხელს შეუწყობს თითოეული რეგიონის, თითოეული კუთხის, სწრაფ აღორძინებას და პროგრესს. არ არსებობს არცერთი ნორმალური ქვეყანა, სადაც მხოლოდ დედაქალაქშია კონცენტრირებული ხელისუფლების ძალისხმევა - სამუშაო ადგილები, ნორმალური ინფრასტრუქტურა თუ დასვენების ან განათლების საშუალებები. ასეთი ქვეყანა, რომ შედეგს ვერ მიაღწევს ეს ჩვენმა უახლესმა ისტორიამ დაგვანახა", – განაცხადა კახი კალაძემ.

მისი თქმით, ამიტომ ხელისუფლებაში მოსვლის პირველივე დღიდან უმთავრესი პრიორიტეტი მთელი ქვეყნის ერთნაირი სიმძლავრით ამუშავება იყო:"ჩვენ ამგვარი პროექტებით ვქმნით არა მარტო მძლავრ ენერგო სექტორს, არამედ ხელს ვუწყობთ მთლიანობაში ქვეყნის ეკონომიკურ გაძლიერებას, მატერიალური დოვლათის შექმნას, რაც თითოეული ჩვენი მოქალაქის სოციალურ პირობებზე, ცხოვრების დონეზე პოზიტიურად აისახება".

„მტკვარი ჰესის“ პროექტი სამცხე-ჯავახეთში, ახალციხის მუნიციპალიტეტში, მდინარე მტკვარზე ხორციელდება. პროექტის ჯამური საინვესტიციო მოცულობა $131 მლნ ამერიკულ დოლარს უტოლდება. ჯამური დადგმული სიმძლავრე 53 მგვტ-ია, ხოლო ელექტროენერგიის საშუალო წლიური გამომუშავება 255 მლნ კვტ.სთ. წარმოებული ელექტროენერგია საგრძნობლად შეამცირებს ქვეყანაში არსებულ ელექტროენერგიის დეფიციტს ზამთარში.

სამშენებლო სამუშაოებზე დასაქმებულია 500 ადამიანი.

„მტკვარი ჰესი“ არის 2009 წელს დაწყებული და შემდეგ წლების მანძილზე გაჩერებული პროექტი, რომელიც 2014 წელს საქართველოს თანაინვესტირების ფონდმა 100%-ით შეისყიდა. ფონდის ჩართულობით და ენერგეტიკის სამინისტროსთან თანამშრომლობით შესაძლებელი გახდა პროექტის გაცოცხლება, რომელიც დღეს უკვე აქტიურ სამშენებლო ფაზაშია. მოხდა ჰესის დადგმული სიმძლავრის ოპტიმიზაცია, რის შედეგადაც სიმძლავრე გაიზარდა 9 მგვტ-ით და გახდა 53 მგვტ. ჰესის ექსპლუატაციაში გაშვება 2019 წლის პირველ კვარტალში იგეგმება.
პროექტში ინვესტიციას საქართველოს თანაინვესტირების ფონდი ახორციელებს.

[sknews.ge]