გარემოს დაცვის მინისტრის მოადგილედ სოლომონ პავლიაშვილი დაინიშნა

სოლომონ პავლიაშვილი 1993-1999 წლებში იყო საქართველოს სოციალური დაზღვევის, ერთიანი სახელმწიფო ფონდის თავმჯდომარის მოადგილე, სოციალური დაზღვევის ინსპექციის უფროსი. 1999 წელს, მაჟორიტარული წესით საგარეჯოს რაიონიდან, არჩეულ იქნა საქართველოს პარლამენტის წევრად. 1999 წელს გახდა საქართველოს საფინანსო საბიუჯეტო კომიტეტის თავმჯდომარის პირველი მოადგილე. ამ თანამდებობაზე მუშაობდა 2001 წლამდე. 2001-2003 წლებში იყო საქართველოს სახელმწიფო ქონების მართვის მინისტრი, ხოლო 2003-2004 წლებში − საქართველოს ეკონომიკური განვითარების მინისტრის მოადგილე. არის საქართველოს ტექნიკური უნივერსიტეტის სრული პროფესორი. 2011 წელს აირჩიეს თბილისის სასწავლო უნივერსიტეტის რექტორად.

გარემოს დაცვის მინისტრის პირველი მოადგილის თანამდებობაზე პავლიაშვილმა თეიმურაზ მურღულია ჩაანაცვლა. პრემიერ-მინისტრის ბრძანების საფუძველზე, მურღულია განათლების მინისტრის, ალექსანდრე ჯეჯელავას მოადგილედ დაინიშნა.

[sknews.ge]