5 ოქტომბერი მასწავლებელთა საერთაშორისო დღეა

ახალციხის მერიაში განმარტავენ, რომ დღის განმავლობაში ღვაწლმოსილ პედგოგებს სახლში ესტუმრებიან და ფასიან საჩუქრებს გადასცემენ.

„ახალციხის ციხეზე წელს სკოლამდელი აღზრდის დაწესებულებათა გაერთიანების პედაგოგებისთვის იქნება ღონისძიება, რომელიც 18:00 საათზე დაიწყება“, – ამბობს ახალციხის მერიის საორგანიზაციო განყოფილების უფროსი ეკა ბერიძე.

შეგახსენებთ, რომ გასულ წელს ახალციხის მერიის ორგანიზებით ღონისძიება საჯარო სკოლების პედაგოგებისთვის გაიმართა.

გასულ წლისგან განსხვავებით დღევანდელ დღესთან დაკავშირებით ღონისძიებას არ გეგმავს ახალციხის მუნიციპალიტეტის გამგეობა.

ქალაქ ახალციხესა და თემში არსებულ სკოლებში დაახლოებით 920 პედაგოგი მუშაობს.

მასწავლებელთა საერთაშორისო დღის აღნიშვნა სათავეს 1994 წლის 5 ოქტომბრიდან იღებს. ამ დღის დაწესების იდეა რამდენიმე პედაგოგიურ ორგანიზაციას ეკუთვნის. მასწავლებელთა საერთაშორისო დღის დაწესება მიზნად მასწავლებლების მხარდაჭერას ისახავს. 5 ოქტომბერს პედაგოგები პროფესიულ დღესასწაულს ყოველწლიურად მსოფლიოს 100-ზე მეტ ქვეყანაში ზეიმობენ.

[თინათინ ზაზაძე, ახალციხე]