მედიკამენტებზე ფასებმა დაიკლო

ახალი ხელისუფლება საკუთარი საქმიანობის ერთ-ერთ დადებით მხარედ წამლების გაიაფებას ასახელებს.

შეგახსენებთ: ფინანსთა მინისტრმა ნოდარ ხადურმა 22 იანვარს ტელეეთერით გამოსვლისას განაცხადა, რომ ახალი ხელისუფლების მოსვლის შემდეგ ბაზარი გაიხსნა და ფასები შემცირდა. ამის მაგალითად ნოდარ ხადურმა საწვავის ბაზარი მოიყვანა.

საწვავზე ფასის დაკლების შემდეგ წამლებიც გაიაფდა. ახალციხის აფთიაქებში ოფიციალურ კომენტარს არ აკეთებენ. თუმცა, როგორც პირად საუბრებში განმარტავენ ბოლო ერთი თვის განმავლობაში ზოგიერთ მედიკამენტზე ფასებმა მართლაც დაიწია.

სააფთიაქო ქსელ ”ფარმადეპოში” კი განმარტავენ, რომ სხვა აფთიაქებთან შედარებით მათთან ფასები ისეც განსხვავებულია. თუმცა, რაც შეეხება ბოლო პერიოდში წამლების გაიაფებას, ამას არ ადასტურებენ.

„პე–ეს–პე“-ში ერთ-ერთ ინტერნეტ გამოცემასთან საუბრისას ამბობენ, რომ ბოლო პერიოდში 608 პოზიციაზე, რომელთა დისტრიბუციასაც კომპანია ახორციელებს, ფასები 20–დან 70 %–მდე შემცირდა. ფასები შემცირება კი, როგორც თავად აცხადებენ, კომპანიამ მომწოდებლებთან მოლაპარაკების შედეგად მოახერხა.

იგივე გამოცემის ინფრომაციით მედიკამენტებზე ფასები ”ავერსმაც” შეამცირა. აღნიშნულ სააფთიაქო ქსელის წარმომადგენლები ამბობენ, რომ ფასები სკლების ტენდენცია ყოველთვიურად მიმდინარეობს და მსგავსი პროცესი ხელისუფლების ცვლილებამდეც ფიქსირდებოდა.

[თამარ თოთაძე, ახალციხე]