გიორგი კოპაძე: ‘მეჩეთები ყველა სოფელში უნდა ჰქონდეთ, სადაც მუსლიმები არიან’

ამის შესახებ გიორგი კოპაძემ დღეს, 21 სექტემბერს, ახალციხის საარჩევნო მედიაცენტრში, არასამთავრობო ორგანიზაციის წარმომადგენლებთან შეხვედრაზე განაცხადა. კოპაძე ამ თემის ხელოვნურად აჟიტირებაში პრესას ადანაშაულებს.

უფრო კონკრეტულად, რეგიონში როგორც ეთნიკური, ასევე, რელიგიური უმცირესობების უფლებების დაცვასა და მათ ჩართულობასთან დაკავშირებით შეკითხვა ასოციაცია „ტოლერანტის“ ხელმძღვანელმა ცირა მესხიშვილმა დასვა.

„პრობლემა არსებობს, მაგრამ ეს პრობლემები არ არის ხელოვნურად შექმნილი. ეს არის გამოწვეული იქიდან, რომ ჩართულობა სხვადასხვა რაიონებში სხვადასხვანაირია. რასაც ვერ იტყვი ახალციხის რაიონზე, აქ 15 დეპუტატიდან სამი ეროვნებით სომეხია“, – ამბობს კოპაძე.

მისი თქმით, გასულ წლებთან შედარებთ, ქვეყანაში თავისუფლების ხარისხი გაცილებით მაღალია, ეს აიხსნება იმითაც, რომ მეტი მაჟრიტარი დეპუტატობის კანდიდატია დასახელებული: „ადამიანებს მეხსიერება დაუქვეითდათ, აღარ ახსოვთ რა იყო მაშინ. როგორ მიუთითებდნენ სოფლებში პოლიციელები თუ ვისთვის უნდა მიეცათ ხმა“.

კოპაძის თქმით, უმცირესობებთან კავშირში არსებული პრობლემები წარსულის გადმონაშთია: „როდესაც მიაჩვიეს ადამიანები, თუნდაც მუსულმანური თემი, რომ მიართმევდნენ რაღაც–რაღაცეებს არჩევნების წინ, მათაც გაუჩნდათ ეს მთხოვნილებები და ახლაც სამართლიანად ითხოვენ. მართალია ბევრი რამე აკლიათ, სწორია, მეჩეთები ყველა სოფელში უნდა ჰქონდეთ სადაც მუსულმანური მოსახლეობაა. რა თქმა უნდა სხვა რამეებიც, მაგრამ არა არჩევნების წინ. ეს უნდა მოხდეს ჩვეულებრივ კანონმდებლობის დარეგულირებით“. [სტილი დაცულია „ს.კ“]

მისი თქმით, სახელმწიფო ხედავს რა ხდება ქვეყანაში და პროცესებსაც სწორად წარმართავს: „პროცესებს მივცეთ საშუალება, რომ განვვითარდეთ, სახელმწიფო ხედავს რა ხდება ქვეყანაში და პროცესებს ისე წარმართავს, როგორც საჭირო არის. ამას გვაჩვენებს ეს არჩევნებიც, იმიტომ, რომ ის მიდის დემოკრატიული პრინციპით: „პროცესები მიდის კარგად და ხელოვნურად ამის აჟიტირება, თუნდაც პრესის მხრიდან, რომელიც ხშირად არის, არ არის სწორი და ამ სიტუაციების დაძაბვა არ არის სწორი“. [სტილი დაცულია „ს.კ“]

შეგახსენებთ, რომ გიორგი კოპაძე ჭელას მოვლენების დროს, სწორედ მუსლიმური სალოცევების, უფრო კონკრეტულად კი ჭელაში მოჭრილი მინარეთის დაბრუნების წინააღმდეგ საპროტესტო აქციებს მართავდა.

„ეს მიწა–წყალი მოფენილია ჩვენი წინაპრების სისხლით, რომელიც ებრძოდა მინარეთებს, მეჩეთებს, მუსულმანებს. ჩვენ ვართ ტოლერანტები, კი ბატონო, ილოცონ თუ უნდათ, თუ უნდათ სულის გაყიდვა გაყიდონ, ჩვენ არ ვეწინააღმდეგებით მაგაში. მაგრამ სისხლის გამოდენაც რომ დაგვჭირდეს, უნდა ვიდგეთ აქ, – მიმართავდა მაშინ ახალციხეში მუსლიმების წინააღმდეგ შეკრებილ ქრისტიანებს გიორგი კოპაძე, –„ არ უნდა გავატართ ეს, [მოჭრილი მინარეთი, რომელიც თბილისიდან ჭელას მიმართუელბთ მიჰქონდათ] გაიგეთ ეს, ქართველებო, თორემ ხვალ ეს ცოტა სხვა რამე იქნება. მეჩეთი ჭელაში რომ დაიდგმება, მერე ახალციხეშიც დაიდგმება და ყველაფერი მაგით დამთავრდება“, – აცხადებდა მაშინ გიორგი კოპაძე.

[თამუნა უჩიძე, ახალციხე]