სოფელ საროს მცხოვრებლები: ტყის ბილეთებს მხოლოდ ‘ოცნების’ მხარდამჭერებს ურიგებენ

საროში ამბობენ, რომ დაახლოებით ორი კვირის წინ ტყის ბილეთები „ქართული ოცნების“ ერთ-ერთმა მხარდამჭერმა კუკური პლაჭიაშვილმა მიიტანა და მხოლოდ იმ 10 ოჯახს დაურიგა, ვინც სახელისუფლებო პარტიის მხარდამჭერია.

„საროს გამგებლის წარმომადგენელი არ ჰყავს დიდი ხანია, პლაჭიაშვილი ყოფილი რწმუნებულია, ახლა „ოცნების“ მხარდამჭერია და ალბათ, ეგ იმიტომ არიგებს ბილეთებს“, -გვეუბნება მამუკა დიასამიძე.

მისივე თქმით, პლაჭიაშვილი „ოცნების“ მხარდამჭერებს პირადად შეხვდა და ბილეთები ისე გადასცა, რომ სოფლის სხვა მაცხოვრებლებს არ გაეგოთ: „ჩუმად დაარიგა. თან გაუფრთხილებია, არავის უთხრათო“.

ზამთარში, საშეშე მერქნის მოსამარაგებლად ბილეთის მიღებას გვიდასტურებს, სოფელ საროს კიდევ ერთი მკვიდრი და „ქართული ოცნების“ მხარდამჭერი.

„კარგით რა, არჩევნები მოდის და ახლა ათას რაღაცას მოიგონებენ. ასე, ეტაპობრივად არიგებენ, „ოცნების“ მხარდამჭერი რომ არ ვყოფილიყავი, მაინც ავიღებდი“, – გვეუბნება შიო ლონდარიძე.

საროში 10 ოჯახისათვის ბილეთების დარიგებას არ უარყოფს „ქართული ოცნების“ მხარდამჭერი კუკური პლაჭიაშვილი. კითხვაზე, რა სტატუსით დაარიგა, გვპასუხობს: „საროს კარგა ხანი რწმუნებული არ ჰყავდა და მე ვეხმარებოდი. მგონი ახლა დაუნიშნიათ და ალბათ ის დაასრულებს დარიგებას“.

მისივე თქმით, მოსახლეობას განუმარტა, რომ ბილეთები ეტაპობრივად გაიცემა და თვის ბოლომდე ყველა მიიღებს. ბილეთების პირველ რიგში „ქართული ოცნების“ მხარდამჭერებისათვის დარიგება ასე ახსნა: „რა მნიშვნელობა ჰქონდა, პირველ ეტაპზე 10 ოჯახს მივეცი ბილეთები და ვისი მხარდამჭერები იყვნენ, არ დავინტერესებულვარ“.

პლაჭიაშვილისაგან განსხვავებით, სამცხე-ჯავახეთის სატყეო სამსახურში განმარტავენ, რომ საშეშე მერქნის მოჭრისთვის ბილეთები ეტაპობრივად არ რიგდება.

„გამოყოფილია მეორე ხარისხის შეშა იმისთვის, რომ მოსახლეობამ მიიღოს. ბანკში არის კოდები და მათი მონაცემები, რომლის მეშვეობითაც, ნებისმიერ დროს შეუძლიათ საშეშე მერქნის მიღება და არა ეტაპობრივად“, - განმარტავს სამცხე-ჯავახეთის სატყეო სამსახურის ხელმძღვანელი მამუკა ცინცაძე.

რაც შეეხება საროს შემთხვევას, ცინცაძის თქმით, როგორ დაარიგა პლაჭიაშვილმა ბილეთები, გაუგებარია: „შესაძლოა, ინდივიდულურად, რამდენიმე პიროვნება შეკრიბა, არ ვიცი რა ნიშნით, მათი მონაცემები წაიღო ბანკში და ისე მიუტანა ბილეთები“.

მოსახლეობის პოლიტიკური ნიშნით შერჩევას მამუკა ცინცაძე აბსურდულს უწოდებს და განმარტავს, რომ რეგიონის მცხოვრებთა 45 პროცენტს საშეშე მერქანი უკვე ათვისებული აქვს და ვინ ვისი მხარდამჭერია, ეს სატყეო სამსახურის ინტერესებში არ შედის.

[ლუბა გიორგაძე, ასპინძა]