1200 საქმე ამნისტიის შესახებ

ამნისტიის შესახებ კანონით ყველას, ვინც 2 ოქტომბრამდე დანაშაული ჩაიდინა სასჯელი ერთი მეოთხედით უმცირდება.

ახალციხის რაიონულმა სასამართლომ 51 პატიმარი უკვე გაათავისუფლა.

- ”დაახლოებით 200 საქმეა კიდევ შემოსული პატიმრების შესახებ სასჯელაღსრულების დაწესებულებებიდან და რამდენიმე თვეში ზოგიერთი პატიმარი შესაძლოა კიდევ გათავისუფლდეს”, - ამბობს ახალციხის რაიონული სასამართლოს თავმჯდომარე გოჩა ჯეირანაშვილი.

1200 საქმიდან სასამართლოში ყველაზე მეტი საქმე პრობაციიდან შევიდა. ახალციხის რაიონული სასამართლო 900-მდე პრობაციონერის საქმეს განიხილავს. ჯეირანაშვილის თქმით, ბევრი საერთოდ გათავისუფლდება როგორც პირობითი მსჯავრისგან, ასევე გამოსაცდელი ვადისგან.

ახალციხის სასამართლო განიხილავს ძებნილი პირების საქმეებსაც, ასეთი სულ 60-მდე საქმეა.

- ”პოლიტდევნილად აღიარეს სამცხე-ჯავახეთის ყოფილი გუბერნატორი გიგლა ბარამიძეც, შესაბამისად, ჩვენ ის გავათავისულფეთ სასჯელისაგან”, -აცხადებს ჯეირანაშვილი.

მოსამართლის განმარტებით, ამნისტია არ ეხება იმ პირებს, ვისაც უვადო პატიმრობა აქვს მისჯილი: ”ასეთი ჩვენ ერთი პირის საქმე გვაქვს, მან სამი მესაზღვრე მოკლა”.

ახალციხის სასამართლოს აღნიშნული საქმეების განსახილველად საქმეების ნაწილზე 2-თვიანი, ნაწილზე კი 4-თვიანი ვადა აქვს.

- ”გაუფრთხილებლობით ჩადენილ დანაშაულზე, რომელსაც ადამიანის სიცოცხლის მოსპობა მოჰყვა 2-თვიანი, თაღლითობაზე კი 4-თვიანი ვადა, გვაქვს. მაგრამ თუ დაზარალებული უარს იტყვის, ასეთ შემთხვევებში მას ამნისტია მაინც შეეხება და ერთი მეოთხედით სასჯელი შეუმსუბუქდება”, - განმარტავს ჯეირანაშვილი და ამატებს, რომ თუ გასათავისუფლებელი, ციხეზეა და ერთი მეოთხედით სასჯელის შემცირების შემთხვევაში სულ თავისუფლდება, მას 4 თვე ლოდინი არ მოუწევს, ის გათავისუფლებული მალევე იქნება.

იმისთვის რომ საქმეების განხილვა გაწერილ ვადაში მოესწროს, როგორც ახალციხის რაიონულ სასამართლოში ამბობენ, თითქმის 24 საათის განმავლობაში უწევთ მუშაობა.

[თამუნა უჩიძე, ახალციხე]