ახალციხის თემში ჰერალდიკის ერთი ნამუშევარი შევიდა

ახალციხის თემმა ჰერალდიკის კონკურსი 4 ივლისს გამოაცხადა. მსურველებს შესაძლებლობა ჰქონდათ საკუთარი ნამუშევრები ერთი თვის ვადაში წარმოედგინათ. 4 აგვისტომდე ადგილობრივ თვითმმართველობაში გერბისა და დროშის მხოლოდ ერთი ნიმუში შევიდა.

იმისათვის, რომ სიმბოლიკა შეირჩეს, ნამუშევარი სპეციალურად შექმნილმა სამუშაო ჯგუფმა უნდა განიხილოს. როგორც გამგეობაში განმარტავენ, კომისიის სხდომა უახლოეს მომავალში გაიმართება. მათ მიერ შერჩეული ნიმუში კი ჰერალდიკის სახელმწიფო კომისიაში გადაიგზავნება.

ნამუშევრების მოწონების ან არ მოწონების თაობაზე, პასუხი ნიმუშის ავტორს 25 აგვისტომდე გაეგზავნება.

გამარჯვებული, პრემიის სახით, 1250 ლარს მიიღებს.

შეგახსენებთ, ახალციხის მუნიციპალიტეტმა ჰერალდიკის კონკურსი სამჯერ გამოაცხადა. პირველ ეტაპზე კონკურსი ჩაიშლა, რადგან მასში მონაწილეობა არავინ მიიღო. მეორედ კომისიაში 5 ავტორის 6 ნამუშევარი შევიდა, თუმცა, კომისიის წევრებმა ყველა ნამუშევარი დაიწუნეს.

[თაკო ფეიქრიშვილი, ახალციხე]