აგვისტოს ომიდან 8 წელი გავიდა

რუსეთ-საქართველოს შეიარაღებული კონფლიქტიდან დღეს 8 წელი გავიდა. რუსეთმა, რომელსაც რეგიონში სამშვიდობოები ჰყავდა, 2008 წლის 8 აგვისტოს ცხინვალის რეგიონში საკუთარი ჯარების ქვედანაყოფები და მძიმე ტექნიკა შეიყვანა. მომდევნო დღეს, პარალელურად რუსეთმა საქართველოს სხვა რეგიონების საჰაერო დაბომბვაც დაიწყო.

ორ ქვეყანას შორის ომის ოფიციალურად დაწყების გამოცხადებამდე 1 აგვისტოდან ინტენსიური სროლები დაიწყო საქართველოს თავდაცვის ქვედანაყოფებსა და სამხრეთ ოსეთის შეიარაღებულ ძალებს შორის, რის შედეგადაც, ექვსი დაიღუპა, ხოლო 21 ადამიანი დაიჭრა. 4 აგვისტოს, რუსეთის 58-ე არმიის ხუთი ბატალიონი როკის გვირაბის სიახლოვეს, ჩრდილოეთ ოსეთის მხარეს იქნა დისლოცირებული. სროლები მომდევნო რამდენიმე დღეს გრძელდებოდა.

ომის შედეგად დაიღუპა საქართველოს 228 მშვიდობიანი მოქალაქე, 14 პოლიციელი, 1 747 კი, მძიმედ დაიჭრა . სახლები დატოვა თითქმის 150 000-მა ადამიანმა, მათგან დღემდე დევნილობაში რჩება 30 000-მდე მოსახლე. რაც შეეხება ომში დაღუპულ სამხედრო მოსამსახურეებს, თავდაცვის სამინისტროს მონაცემებით, სულ დაღუპულად 169 სამხედრო მიიჩნევა.

[sknews.ge]