რა ეტაპზეა ბათუმი–ახალციხის დამაკავშირებელი გზის მშენებლობა

პროექტი, რომელიც ბათუმი–ახალციხის დამაკავშირებელი გზის მშენებლობადაა ცნობილი, ახალციხე–ადიგენს შორის, ე.წ. ფარეხის გზის 10–კილომეტრიან მონაკვეთს მოიცავს. აქ ამ დროისთვის 10–ვე კილომეტრზე სამუშაოები ერთიანად მიმდინარეობს და ასფალტის საფარი მთლიანად მოხსნილია.

„ასფალტ–ბეტონის მოფრეზვა 10 კილომეტრზევე ერთიანად მოხდა“, – აცხადებენ საავტომობილო გზების დეპარტამენტში და ამ მონაკვეთის ერთიანად აყრის მიზეზს ასე ხსნიან: „აქ 18 წყალგამტარი და ერთი სახიდე მოწყოგილობა უნდა გაკეთდეს. ამ წყალგამტარებმა მიწისქვეშა წყლები უნდა გაატარონ. ამის გამო სამუშაოები ეტაპობრივად ვერ განხორციელდებოდა“.

ამ დროისთვის, როგორც „სამხრეთის კარიბჭესთან“ საავტომობილო დეპარტამენტში აცხადებენ, 6 წყალგამტარი მილი უკვე მოწყობილია: „ახლა მეშვიდე და მერვე მილის გაკეთებაზე მუშაობენ. ასევე მოწყობილია ყრილები, გარდა ამისა, მიმდინარეობს ქვეშაგები ფენის გაკეთება და გრუნტის სამუშაოები“.

სამუშაოები დეკემბრის ბოლოს დასრულდება.

„მანამდე აქ დროებით, შემოვლითი გზა გაკეთდა და გადაადგილება მისი საშაულებით შეუძლიათ“, – ამბობენ საავტომობილო გზების დეპარტამენტში.

უწყებაში აცხადებენ, რომ ფარეხის გზაზე არსებული ძველი ქვის თაღის მოშლა არ იგეგმება. ეს თაღი 1900–1905 წლებშია აშენებული. კულტურული მემკვიდრეობის დაცვის ეროვნული სააგენტოს მონაცემებით თაღს არ აქვს კულტურული მემკვიდრეობის ძეგლის სტატუსი, თუმცა, ხანდაზმულობითა და საინჟინრო მნიშვნელობით ძეგლის ნიშნებს ატარებს, ამიტომ მისი დემონტაჟი დაუშვებელია.

შეგახსენებთ, ბათუმი–ახალციხის საავტომობილო გზის მონაკვეთის რეაბილიტაციასთან დაკავშირებით, სამუშაოების შემსრულებელ კომპანიასა და საქართველოს რეგიონული განვითარების სამინისტროს საავტომობილო გზების დეპარტამენტს შორის ხელშეკრულებას ხელი 24 მარტს მოეწერა. პროექტისთვის 8 მილიონ 500 ათასი ლარი დაიხარჯება.





[თამუნა უჩიძე, ახალციხე]