‘სამხრეთის კარიბჭემ’ საცდელი რადიომაუწყებლობა დაიწყო

რადიო „სამხრეთის კარიბჭე“ ამავე სახელწოდების გაზეთისა და საინფორმაციო სააგნეტოს ბაზაზე დაარსდა. როგორც გამოცემის დირექტორი ლელა ინასარიძე ამბობს, რადიო საცდელ რეჟიმში რამდენიმე თვის განმავლობაში იმაუწყებლებს: „ამ ეტაპზე მიმდინარეობს კადრების გადამზადება და ასევე, ვემზადებით გადაცემებისთვის, როგორც საინფორმაციო, ასევე, შემეცნებითი, პოლიტიკური და ა.შ. ვფიქრობთ, რომ სექტემბრიდან ჩვენს ეთერში მხოლოდ მუსიკა აღარ იქნება“.

მისივე განმარტებით, რადიოს საინფორმაციო ბადე უკვე შემუშავებულია. რადიოს ექნება როგორც საზოგადოებრივ – პოლიტიკური, ასევე საინფორმაციო და გასართობი გადაცემები და იმაუწყებლებს 24 საათის განმავლობაში. გადაცემები იქნება როგორც ქართულ, ასევე სომხურ ენაზე. რადიოსთვის „სამხრეთის კარიბჭეს“ გუნდი იმუშავებს, თუმცა, დაგეგმილია კადრების დამატებაც.

1 ივლისიდან რადიო უკვე საინფორმაციო გამოშვებებს დაიწყებს. საინფორმაციო პროგრამა დღეში 4–ჯერ გავა: 10:00, 12:00, 16:00 და 18:00 საათზე.

გაზეთი „სამხრეთის კარიბჭე“ 2004 წელს, ომისა და მშვიდობის გაშუქების ინსტიტუტმა დააარსა. იმის გამო, რომ სამცხე–ჯავახეთი მულტიეთნიკური რეგიონია, გაზეთი ორენოვანია, ქართულ–სომხური. 2012 წლიდან გაზეთის ბაზაზე ამავე სახელწოდების საინფორმაციო სააგენტო დაარსდა, რომელიც მულტიმედია მასალებითაა დატვირთული.

[ნინო ნარიმანიშვილი, ახალციხე]