პანიკის საფუძველი არ არსებობს

ამის შესახებ გამოცემა ”ნეტგაზეთს” ილიას სახელმწიფო უნივერსიტეტის სეისმოლოგიურ ცენტრში განუცხადეს.

”გთხოვთ, დაგვეხმარეთ და გაავრცელეთ ინფორმაცია, რომ შეუძლებელია წინასწარ მოსალოდნელი მიწისძვრის შესახებ ინფორმაციის მოპოვება. ეს რომ წინასწარ გვცოდნოდა, გუშინ რომ მოხდებოდა მიწისძვრა, გუშინაც გავავრცელებდით ამ ინფორმაციას," - უთხრეს "ნეტგაზეთს" სეისმოლოგიურ ცენტრში.

მათივე ცნობით, განმეორებითი ბიძგები შეიძლება დაფიქსირდეს, ან შეიძლება აღარც განმეორდეს.

დღეს, დაახლოებით ნახევარი საათის წინ ახალციხეში გავრცელდა ინფორმაცია, რომ 2-დან 3 საათამდე მოსალოდნელია ძლიერი მიწისძვრა.

”სამხრეთის კარიბჭეს” ერთ-ერთ საბავშო ბაღიდან აცნობეს, რომ მშობლებმა ბავშვები ბაღებიდან გაიყვანეს. პანიკაა სამსახურებში, სკოლებსა და უნივერსიტეტში. ამ წუთებში თითქმის ყველა ამ დაწესებულებიდან პერსონალი ქუჩაშია გამოსული.



”არ ვიცი ვნ გაავრცელა ეს ინფორმაცია, ვიღაც ერთობა და ქმნის პანიკას, ჩვენ მსგავსი განცხადება არ გაგვიკეთებია. ვთხოვთ, დახმარებას ჟურნალისტებს, ყველაზე მეტად თქვენ შეგიძლიათ გააგებინოთ ხალხს, რომ პანიკის საფუძველი არ არსებობს. მიწისძვრა ხდება ყოველდღე და თუ კი დავპანიკდებით, მაშინ ვერც სკოლაში ვივლით და ვერც ბაღში და ვიცხოვროთ ქუჩაში. ძლიერი მიწისძვრის პროგნოზირება არ ხდება," - განუცხადა გამოცემა ”ნეტგაზეთს” ილიაუნის სეისმოლოგიური ცენტრის საინფორმაციო ჯგუფის ხელმძღვანელმა ნინო თვარაძემ.




ფოტოები: ნინო გოგოლაძე

[ნინო ნარიმანიშვილი, ახალციხე]