მსოფლიოს სხვადასხვა ქალაქის ღირშესანიშნაობები საქართველოს დროშის ფერებში განათდება

საქართველოს საგარეო საქმეთა სამინისტროს ინფორმაციით, 26 მაისის დღესასწაულთან დაკავშირებით, საზეიმო ღონისძიებები მსოფლიოს არაერთ ქვეყანაში გაიმართება.

ქართული დროშის ფერებში განათდება: ავსტრალიის ძველი პარლამენტის შენობა. უნგრეთის „ერჟებიტის“ ხიდი, სლოვაკეთის ქ. კოშიცეს მუნიციპალიტეტის შენობა, ლიუბლიანის ციხესიმაგრე, საუდის არაბეთში რიადის ყველაზე მაღალი შენობა „Kingdom Tower“, ესტონეთის ბიზნესცენტრი, რომელშიც მდებარეობს საქართველოს საელჩო. ქ.სტამბოლში საქართველოს დროშის ფერებით განათდება ბოსფორის ხიდი.

კვიპროსსა და ინდონეზიაში განათდება დედაქალაქის ტურისტული ცენტრები. ლიტვაში, საქართველოს დროშის ფერებში განათდება კაუნასის ცენტრალური ღირშესანიშნაობა, ქრისტეს აღდგომის ტაძარი, ასევე საქართველოს გიგანტური დროშა გამოიფინება ქ. ვილნიუსის ცენტრალურ ადგილზე, მდინარე ნერისის სანაპიროზე და ასევე ჰაერში გაუშვებენ საქართველოსა და ლიტვის დროშების ფერებში მოხატულ ფრანებს.

საბერძნეთში საქართველოს დროშის ფერებით მოხატულ საჰაერო ბურთებს გაუშვებენ. კანადაში, მერიის წინ, საქართველოს დროშა აღიმართება.

ყაზახეთში, დედაქალაქის მასშტაბით განთავსებულ ბანერებზე საქართველოს სახელმწიფო სიმბოლოები იქნება გამოსახული. დუბლინის ცენტრში, 25-დან 30 მაისის ჩათვლით საქართველოს დროშები გამოიფინება.

ბელგიაში, დედაქალაქის მთავარი სიმბოლო „მანეკენ პისი“ ქართულ ეროვნულ სამოსში შეიმოსება.

მოლდოვაში, ქალაქის ცენტრში მდებარე ტრიუმფალური თაღის განათება იგეგმება.

ბრაზილიაში, კორკოვადოს მთაზე, მსოფლიო დროშების ხეივანში, საქართველოს დამოუკიდებლობის დღის აღსანიშნავად უკვე აღიმართა საქართველოს დროშა.

[sknews.ge]