ახალციხეში ფოტო–ვიდეო სტუდია გაიხსნა

ფოტო–ვიდეო სტუდია ,,S & S” ფოტოგრაფ სერგეი ფიდანიანსა და მის პარტნიორს სოსო ჩლაჩიშვილს ეკუთვნით. მათ პროექტი 2015 წელს დაწერეს და სახელმწიფო დაფინანსება 10 000 ლარი მოიპოვეს. თანხა სტუდიის მოწყობასა და შესაბამისი აპარატურის შეძენას მოხმარდა. ამბობენ, რომ ამიერიდან შესაძლებლობა აქვთ მსურველებს ფოტო–ვიდეო მომსახურება, როგორც სტუდიაში, ასევე მის გარეთაც გაუწიონ.

„ასეთი სტუდიის გახსნაზე დიდ ხანს ვოცნებობდი. თუმცა ყველაზე დიდი პრობლემა, ფინანსები იყო, მინდოდა, რომ უმაღლესი ხარისხის
აპარატურა მქონოდა. შარშან მე და სოსოს ასეთი შესაძლებლობა ,,აწარმოე საქართველოს“ ფარგლებში მოგვეცა“– განმარტავს, ფოტოგრაფი სერგეი ფიდანიანი.

ფოტო–ვიდეო სტუდიის გახსნას ადგილობრივი თვითმმართველობის, არასამთავრობო ორგანიზაციების და სახელმწიფო პროგრამის ,,აწარმოე საქართველოში“ წარმომადგენლები ესწრებოდნენ.

,,ეს არის ახალი სერვისი რაიონისთვის და ზოგადად რეგიონისთვის, არსებულ ვიდეოგადაღებას წვეულებებისთვის დაემატა სტუდიური გადაღება. მსგავსი სტუდია რეგიონში არ დაფინანსებულა, არის ფოტო–ვიდეო გადაღების სხვა პროექტები, თუმცა ისინი უფრო გარე გადაღებებზე მუშაობენ“, – განმარტავს მიკრო და მცირე მეწარმეობის ხელშეწყობის პროგრამის დირექტორი სამცხე–ჯავახეთში ირინა ჩხეიძე.
სტუდია ,,S & S” ახალციხეში, მიქუტიშვილის ქუჩაზე, ,,დომბიტის“ შენობაში მდებარეობს.

,,ჩვენთან შესაძლებელია პორტფოლიოს, ქორწილების, დღესასწაულებისა თუ ჩვილების ფოტო გადაღება, ასევე, კლიპებისა და სარეკლამო რგოლების დამზადება. ეს ქალაქში სიახლეა, ვიმედოვნებთ, რომ ჩვენი საქმიანობა წარმატებული იქნება“–ამბობს სტუდიის ერთ–ერთი დამფუძნებელი სოსო ჩლაჩიშვილი.



[თაკო ფეიქრიშვილი, ახალციხე]