'ხსოვნის მსვლელობა' – 9 მაისი ნინოწმინდაში [Photo]

სამცხე–ჯავახეთის სხვა მუნიციპალიტეტებისაგან განსხვავებით, ნინოწმინდაში 9 მაისს მუნიციპალიტეტიდან მეორე მსოფლიო ომში დაღუპული ყველა ადამიანი გაიხსენეს. ომში გარდაცვლილთა ოჯახის წევრებმა გარდაცვლილი წინაპრების ფოტოებით მსვლელობა მოაწყეს და საბოლოოდ, გარდაცვლილთა მემორიალთან შეიკრიბნენ.

ამჯამად ნინოწმინდაში მეორე მსოფლიო ომის 4 ვეტერანი ცხოვრობს. ტრადიციულად, მკერდზე მიმაგრებული, მეორე მსოფლიო ომში გამოჩენილი მამაცობისთვის მიღებული ჯილდოებით, მემორიალთან ოთხივე მათგანიც მივიდა.

ვეტერაებთან ერთად, სამამულო ომში დაღუპულთა მემორიალი გვირგვინებით შეამკეს ადგილობრივი თვითმართველობის ხელმძღვანელმა პირებმა და მუნიციპალიტეტის მაჟორიტარმა დეპუტატმა.

სამცხე-ჯავახეთის სხვა მუნიციპალიტეტებისაგან განსხვავებით, ნინოწმინდის გამგეობამ ომის ვეტერანებს, ადგილობრივი ბიუჯეტიდან, ერთჯერადი დახმარების სახით 500 ლარი გადასცა.

სხვა ვეტერანების მსგავსად, ნინოწმინდაში მცხოვრები ვეტერანები სახელმწიფოსგან საჩუქრად 600 ლარს მიიღებენ, მარჩენალ დაკარგული ოჯახები კი 300–ს. გარდა ამისა, საქართველოს პრეზიდენტის ინიციატივით, მეორე მსოფლიო ომის მონაწილეებს მედიკამენტების ვაუჩერები გადაეცემათ.

რადიო "ნორის" ფოტოები















[ლუბა გიორგაძე, ნინოწმინდა]