20 მაისიდან პირველკლასელთა ონლაინ რეგისტრაცია იწყება

საქართველოს განათლებისა და მეცნიერების სამინისტრო 2014–2015 სასწავლო წლისთვის პირველკლასელთა რეგისტრაციას სამ ეტაპად ახორციელებს. პირველ ეტაპზე რეგისტრირებული მოსწავლეების დოკუმენტების მიღება 15 მაისს დასრულდა. 20 მაისიდან კი პირველკლასელთა საყოველთაო ონლაინ რეგისტრაცია დაიწყება, რომელიც 20 ივნისს, 21:00 საათზე დასრულდება.

რეგისტრაცია განათლებისა და მეცნიერების სამინისტროსა და განათლების მართვის საინფორმაციო სისტემის ვებგვერდებზე სპეციალური სარეგისტრაციო ფორმის საშუალებით იქნება შესაძლებელი.

განათლების სამინისტროს ინფორმაციით, პირველკლასელთა რეგისტრაციას უზრუნველყოფს მშობელი, რომელსაც რეგისტრაციის ფორმაში შეჰყავს მოსწავლის სახელი და გვარი, პირადი ნომერი, დაბადების თარიღი, მშობლის პირადი ნომერი. ასევე, ტელეფონის ნომერი, რომ რეგისტრაციის წარმატებით დასრულების შესახებ მოკლე ტექსტური შეტყობინება მიიღოს.

სამინისტროში განმარტავენ, რომ სისტემა არეგისტრირებს მხოლოდ იმ ბავშვებს, რომელთაც 2015 წლის პირველ იანვრამდე უსრულდებათ 6 წელი. გამონაკლისის სახით რეგისტრირდებიან ის მოსწავლეები, რომლებიც 2013-2014 სასწავლო წელს რეგისტრირებულნი იყვნენ კერძო სკოლების მოსამზადებელ კლასებში. მოქმედი კანონმდებლობა ამ წესიდან გამონაკლისს არ ითვალისწინებს.

საქართველოს განათლებისა და მეცნიერების სამინისტრო მშობლებს ურჩევს, რომ რეგისტრაციის დაწყებამდე ყურადღებით გაეცნონ რეგისტრაციის ინსტრუქციას. ასევე გაითვალისწინონ, რომ ერთდროულად რამდენიმე პირის მიერ, პარალელურად ან რამოდენიმეჯერ, ერთი და იმავე ბავშვის რეგისტრაციის მცდელობა დაუშვებელია, რამდენადაც სისტემა ავტომატურად შეზღუდავს რეგისტრაციას.

[sknews.ge]