ახალციხე–თბილისის მაგისტრალზე ათობით ტრაილერია გაჩერებული

ახალციხე–თბილისის მაგისტრალზე გაჩერებული ათობით ტრაილერის მძღოლი მის რიგს ელოდება, რომ საპატრულო პოლიციამ ნება დართოს ვალეს საბაჟოს მიმართულებით მოძრაობა გააგრძელოს.

„დილით ტრასაზე ვიდექით, ახლა მანქანები მინდორში გადავიყვანეთ. პოლიცია გვეუბნება, რომ თურქეთის საბაჟოზეა პრობლემა და 5–5 მანქანას ეტაპობრივად გაგვიშვებენ. არ ვიცით აქ რამდენ ხანს მოგვიწევს ლოდინი“, – ამბობენ მძღოლები.

საქართველოს შინაგან საქმეთა სამინისტროში აცხადებენ, რომ სატვირთო მანქანების გაჩერების მიზეზი თურქეთის საბაჟო გამშვებ პუნქტზე ტექნიკური შეფერხებაა.

„თურქეთის მხარეს საბაჟო 24–საათიანი მომსახურების რეჟიმზე გადადის. აქამდე ასე არ იყო და ამიტომ ახლა იქ გარკვეული სამუშაოები მიმდინარეობს. საბაჟოზე რომ არ შეიქმნას საცობი, მანქანებს პოლიცია ეტაპობრივად ატარებს და პროცესს არეგულირებს, რამდენ მანქანასაც თურქეთი გაატარებს, აქედან იმდენს გაუშვებენ“, – ამბობენ საქართველოს შინაგან საქმეთა სამინისტროში.



[Sknews.ge]