ევროპის იმუნიზაციის კვირეულს ახალციხე უერთდება

იმუნიზაციის კვირეულს ახალციხე კონკრეტული აქტივობებით 26 აპრილიდან შეუერთდება. ახალციხის მუნიციპალიტეტის საზოგადოებრივი ჯანდაცვის სამსახურის ინფორმაციით, სოფელ კლდისა და ურავლის საჯარო სკოლებში აცრების შესახებ საინფორმაციო სახის შეხვედრები გაიმართება. მსგავი აქტივობაა დაგეგმილი ვალისა და აწყურის სკოლებშიც. კვირეულის ფარგლებში მოსწავლეებს ეპიდემიოლოგები და იმუნიზაციის ექიმები შეხვდებიან.

აცრების შესახებ საინფორმაციო ბუკლეტების დარიგება იგეგმება ქალაქ ახალციხეში არსებულ საგანამანთლებლო დაწესებულებებსა და საბავშვო ბაღებშიც. საზოგადოებრივი ჯანდაცვის ცენტრის ინფორმაციით, იგეგმება მოსახლეობის გამოკითხვაც, იმის შესახებ ფლობენ თუ არა ისინი იმუნიზაციის შესახებ ინფორმაციას.

საქართველო, როგორც ჯანმრთელობის მსოფლიო ორგანიზაციის ევროპის რეგიონის წევრი ქვეყანა, იმუნიზაციის კვირეულში მონაწილეობას 2007 წლიდან იღებს.

იმუნიზაცია ადამიანებს იმ დაავადებებით გამოწვეული ინვალიდობისა და სიკვდილისაგან იცავს, რომელთა თავიდან აცილებაც ვაქცინებით არის შესაძლებელი. მათ შორისაა დიფთერია, ყივანახველა, В ჰეპატიტი, წითელა, წითურა, პნევმონია, პოლიომიელიტი, როტავირუსული დიარეა, ტეტანუსი და საშვილოსნოს ყელის კიბო.

[თაკო ფეიქრიშვილი, ახალციხე]