სამცხე–ჯავახეთში პაპილომა ვირუსზე აცრები იწყება

"ახალციხის საზოგადოებრივი ჯანდაცვის ცენტრის" ექიმის ლია ზედგინიძის თქმით, უკვე გადამზადებულები არიან სოფლის ექიმები და კლინიკების ექიმები, რომლებიც ამ მიმართულებით იმუშავებენ, აცრები კი სექტემბრიდან დაიწყება.

იმუნიზაციის სახელმწიფო პროგრამის ფარგლებში, პაპილომა ვირუსზე აიცრებიან 10–11 წლის გოგონები: „ეს ვირუსი აზიანებს საშვილოსნოს ყელის ლორწოვანს, რომელიც კიბოს წინარე პერიოდია და სწორედ ამის პრევენციას ემსახურება აცრები“.

ლია ზედგინიძის თქმით, პაპილომა ვირუსის იმუნიზაცია სახელმწიფო პროგრამის ფარგლებში ახალი დანერგილია და სამცხე–ჯავახეთში პირველად განხორციელდება.

პაპილომა ვირუსზე აცრები, სამცხე–ჯავახეთის გარდა, სხვა რეგიონებშიც ჩატარდება. საშვილოსნოს ყელის კიბო მსოფლიოში ერთ–ერთი ყველაზე გავრცელებული დაავადებაა.

რა არის პაპილომა ვირუსი:

პაპილომა ვირუსი რეპროდუქციული ქალისა და მამაკაცის სასქესო სისტემის ყველაზე გავრცელებული ვირუსული ინფექციაა.

ადამიანმა შეიძლება არც იცოდეს, რომ ინფიცირებულია. დაავადების ზუსტი დიაგნოსტიკა მხოლოდ შესაბამისი გამოკვლევის შედეგადაა შესაძლებელი. ვირუსი გადაეცემა ინფიცირებული გენიტალიების (სასქესო ორგანოების) კანთან, ლორწოვან გარსებთან და ორგანიზმის ბიოლოგიურ სითხეებთან კონტაქტის შედეგად. პაპილომავირუსით ინფიცირების რისკფაქტორებია:

• სქესობრივი პარტნიორების ხშირი ცვლა;
• პრეზერვატივის არგამოყენება სქესობრივი აქტის დროს.

პაციენტს შეიძლება არა ერთი, არამედ რამდენიმე ტიპის პაპილომა ვირუსი ჰქონდეს. ყველაზე ხშირად ამ დაავადებით ინფიცირება და გამოვლენა 18-დან 35 წლის ასაკში ხდება.

ვაქცინაცია პაპილომავირუსით გამოწვეული საშვილოსნოს ყელის კიბოსგან დაცვის ყველაზე ეფექტური საშუალებაა. ამ ვირუსის საწინააღმდეგოდ აცრა რეკომენდებულია ისეთ ადრეულ ასაკში, როგორიცაა 8-9 წელი.

[ლუბა გიორგაძე, ახალციხე]