პრემიერი პრეზიდენტს მიმართავს არჩევნების თარიღის შესახებ ახალი განკარგულება გამოსცეს

საქართველოს მთავრობის ადმინისტრაციის ცნობით, პრემიერი პრეზიდენტის ადმინისტრაციას არჩევნების თარიღთან დაკავშირებულ განკარგულებაზე მოტივირებულ შენიშვნებს დღეს გაუგზავნის.

პრემიერის განცხადებით, არჩევნების თარიღი, 8 ოქტომბერი, პრეზიდენტთან კონსულტაციის შედეგად, კონკრეტული მიზეზების გამო შეირჩა.

თუმცა, იყო გარკვეული ხარვეზი: „არ მოხდა ადმინისტრაციის მხრიდან დროული და კორექტული ინფორმაციის მიწოდება. ამიტომ, დღეს ვაგზავნით მოტივირებულ შენიშვნებს, რათა წარმოდგენა პრეზიდენტის მხრიდან არჩევნების თარიღის დანიშვნის შესახებ მოხდეს ისეთ დროს, რომ გამოქვეყნება დაემთხვეს ჩვენი მხრიდან კონტრასიგნაციას“ .

მისივე განცხადებით, ვინაიდან წინასაარჩევნო პერიოდად აღებული უნდა იყოს 3 თვე, უმჯობესი იქნება, თუკი პრეზიდენტი არჩევნებთან დაკავშირებულ განკარგულებას 8 ივლისს გამოაქვეყნებს.

„რაც შეეხება თარიღს, ვინაიდან ამან გამოიწვია ფართო განსჯა, სხვადასხვა პარტიების მხრიდან და სამოქალაქო სექტორის მხრიდანაც გამოითქვა საყვედური, გვინდა ვთხოვოთ, რომ პრეზიდენტის ადმინისტრაციის მხრიდან დოკუმენტი წარმოდგენილი იყოს ისეთ დროს, რომლის გამოქვეყნებაც დაემთხვევა 8 ივლისს და 3 თვე იყოს აღებული წინასაარჩევნო ვადად. ვფიქრობ, ამ შემთხვევაში ყოველგვარ გაუგებრობას და სხვადასხვა ინტერპრეტაციას თავიდან ავიცილებთ,“ – აღნიშნა პრემიერ-მინისტრმა.

შეგახსენებთ, 5 აპრილს, სპეციალურ ბრიფინგზე, საქართველოს პრეზიდენტმა გიორგი მარგველაშვილმა განაცხადა, რომ არჩევნები 8 ოქტომბერს გაიმართება. ამ განცხადებას არასამთავრობოების კრიტიკა მოჰყვა.

[ნინო ნარიმანიშვილი, ახალციხე]