ახალციხის გამგეობა შტატებს ზრდის

ახალციხის გამგეობის თანამშრომლებს 8 ტერიტორიულ ორგანოში გამგებლის წარმომადგენლის თანაშემწეები დაემატებათ.

ახალციხის მუნიციპალიტეტში არსებული 15 ადმინისტრაციული ერთეულიდან გამგებლის წარმომადგენლის თანაშემწე 13 მათგანში დაინიშნება. თანაშემწის პოზიცია არ დაიშვა მხოლოდ ორ ადმინისტრაციულ ერთეულში: საძელსა და ანდრიაწმინდაში. მიზეზად დასახლებებში მცხოვრებთა სიმცირეს ასახელებენ.

აღნიშნულ საკითხზე დეპუტატებმა დღეს, 31 მარტს გამართულ სხდომაზე იმსჯელეს.

ახალციხის გამგეობის ადმინისტრაციაში, შტატების რაოდენობის გაზრდას, ბოლო დროს განხორციელებული რეფორმებით ხსნიან.

„დამატების აუცილებლობა ბევრი ფაქტორით არის გამოწვეული. მხოლოდ ორი შემიძლია ახლა დავასახელო: ეს არის კანონი მაღალმთიანობის შესახებ, რომლითაც საკმაოდ გაიზარდა თვითმმართველი თემის ფუნქციები და ყოველდღიური რუტინა. და მეორე, იუსტიციის მინისტრის განცხადება, რომლითაც გამარტივებულია მიწის რეგისტრაციის პროცედურები, სწორედ ამ მიწის აღიარების პროცედურაში ლომის წვლილი მიუძღვის და ძირითადი საქმის წარმოება მიმდინარეობს მუნიციპალიტეტში“, – განმარტავს ახალციხის გამგეობის ადმინისტრაციული სამსახურის უფროსი ილია ზარდიაშვილი.

შტატების გაზრდის საკითხს მხარი არ დაუჭირა „ერთიანმა ნაციონალურმა მოძრაობამ“.

„ასეთი გაუაზრებელი გადაწყვეტილებისა და ზოგადად, შტატების მატების წინააღმდეგი ვარ. სოფლის რწმუნებულებიც, რაც არ უნდა მტკივნეული იყოს, არავინ არაფერს აკეთებს. თუ გინდათ, ეს თვითონ მოსახლეობას ჰკითხეთ სოფლებში“, – ამბობს უმცირესობის დეპუტატი მაკა სუდაძე.

უმცირესობის პროტესტის მიუხედავად, საკრებულოში საკითხი დამტკიცდა. ადგილობრივ თვითმმართველობაში განმარტავენ, რომ 8 ადმინისტრაციულ ერთეულში თანაშემწის პოზიციაზე ვაკანსია უახლოეს დღეებში გამოცხადდება.

გამგეობის წარმომადგენლის თანაშემწის თანამდებობრივი სარგო დარიცხული 540 ლარი იქნება.

[თაკო ფეიქრიშვილი, ახალციხე]