საქსტატი: 2015 წელს ცოცხლად დაბადებულთა რაოდენობა 2,3%–ით შემცირდა

საქსტატის ინფორმაციით, 2015 წელს 59. 249 ბავშვი დაიბადა, – 30.902 ბიჭი და 28.347 გოგო.

როგორც საქსტატში აცხადებენ, 2008 წლიდან ცოცხლად დაბადებულთა რიგითობის განაწილებაში მნიშვნელოვანი ცვლილებები შეინიშნება. კერძოდ, დაბადებულთა საერთო რიცხოვნობაში გაიზარდა მესამე და მომდევნო შვილების წილი, პირველი შვილის წილი კი შემცირდა, ხოლო მეორე შვილის წილი თითქმის უცვლელი დარჩა.

ეს ტენდენცია 2015 წელსაც გაგრძელდა და წინა წელთან შედარებით პირველი შვილის პროცენტული წილი 1,8 პუნქტით შემცირდა, მესამე და მომდევნო შვილის წილი 1,8 პუნქტით გაიზარდა, ხოლო მეორე შვილის წილი უცვლელი დარჩა.



გარდა ამისა, საქსტატის მონაცემებით, წინა წელთან შედარებით 2015 წელს დაბადებულთა საერთო რიცხოვნობაში 25 წლამდე ასაკის დედების მიერ შობილი ბავშვების წილი 40,7 პროცენტიდან 38,8 პროცენტამდე შემცირდა.

2015 წელს დედის საშუალო ასაკმა პირველი ბავშვის დაბადებისას 25,0 წელი შეადგინა.



[ნინო ნარიმანიშვილი, ახალციხე]