პარლამენტი სახელმწიფო უსაფრთხოების სამსახურის ანგარიშს მოისმენს

ანგარიშს სესიაზე სამსახურის ხელმძღვანელი ვახტანგ გომელაური წარადგენს.

გუშინ კი სუს-ის საქმიანობის ამსახველი დოკუმენტი პარლამენტის სამ კომიტეტს სახელმწიფო უსაფრთხოების სამსახურის ხელმძღვანელის მოადგილემ, ლევან იზორიამ გააცნო.

ანგარიში მოიცავს ისეთ თემებს, როგორიცაა: ოკუპირებული ტერიტორიები, კონტრდაზვერვითი საქმიანობა, ტერორიზმთან ბრძოლა, კიბერუსაფრთხოება, ქიმიური, ბიოლოგიური, რადიოლოგიური და ბირთვული უსაფრთხოება, მასობრივი განადგურების იარაღის და მასალების გავრცელების წინააღმდეგ ბრძოლა, კორუფციის წინააღმდეგ ბრძოლა და სხვა საკითხები, რომელიც სუს-ის საქმიანობის პრეროგატივას განეკუთვნება.

ანგარიშის თანახმად, რომელიც 2015 წლის 1-ლი აგვისტოდან 31 დეკემბრის ჩათვლით პერიოდს მოიცავს, ანტიკორუფციული სააგენტოს წარმოებაში სისხლის სამართლის 142 საქმეა. სახელმწიფო უსაფრთხოების სამსახურმა კორუფციულ დანაშაულთან დაკავშირებით გამოძიება სისხლის სამართლის 29 საქმეზე დაიწყო – მათ შორის, ქრთამის აღების - 14, თაღლითობის - 5, მითვისების ან გაფლანგვის - 3, კომერციული მოსყიდვის - 2, სამსახურებრივი სიყალბის - 2, სამსახურებრივი უფლებამოსილების ბოროტად გამოყენების 1 ფაქტზე და სხვა ცალკეულ დანაშაულებზე. დაკავებულია 16 პირი.

"სახელმწიფო უსაფრთხოების უზრუნველყოფაში კორუფციის წინაღმდეგ ბრძოლას გადამწყვეტი მნიშვნელობა ენიჭება. კორუფცია ხელყოფს საჯარო სექტორის გამართულ ფუნქციონირებას, ასუსტებს სახელმწიფო ინსტიტუტების მიმართ საზოგადოების ნდობას, აფერხებს ქვეყნის სტაბილურ და დემოკრატიულ განვითარებას. კორუმპირებული საჯარო მოხელეები დანაშაულებრივი დაჯგუფებებისა და უცხო ქვეყნების სპეცსამსახურების პოტენციურ სამიზნეებს წარმოადგენენ. სწორედ ამიტომ, კორუფციის წინააღმდეგ ბრძოლა სახელმწიფო უსაფრთხოების საკითხია. სახელმწიფო უსაფრთხოების სამსახურის ერთ-ერთ ძირითად პრიორიტეტს სამოხელეო დანაშაულის, საჯარო სამსახურში ინტერესთა შეუთავსებლობისა და კორუფციის ფაქტების, მათ შორის, "ელიტური კორუფციის" პრევენცია, გამოვლენა და აღკვეთა წარმოადგენს", - აღნიშნულია სახელმწიფო უსაფრთხოების სამსახურის მიერ გამოქვეყნებულ ანგარიშში.

[sknews.ge]