სატყეოს ტერიტორიაზე დიდი რაოდენობით მერქანია დასაწყობებული

როგორც სამმართველოში განმარტავენ, დაახლოებით 200-250 კუბური მეტრი მერქანი, რომელიც ამ ეტაპზე სამმართველოსთან ინახება, სახელმწიფოს საკუთრებაა. აღნიშნული მასალა შავი ზღვის ელექტრო-გადამცემი ხაზის მშენებლობისას სამცხე-ჯავახეთის ტერიტორიაზე მოიჭრა.

”ქალაქში დადის ჭორები, რომ თითქოს ეს არის ჩამორთმეული ხე-ტყე, რაც სიმართლეს არ შეესაბამება. ეს არის მხოლოდ და მხოლოდ სპეციალური ჭრების შედეგად მოპოვებული მერქნული რესურსი, - განმარტავს ბუნებრივი რესურსების სააგენტოს ტყისა და ველური ბუნების მართვის დეპარტამენტის სამცხე-ჯავახეთის სამმართველოს უფროსი მეტყევე დავით კახიშვილი და ამატებს, რომ გარდა ახალციხისა დაახლოებით 800-900 კუბური მეტრი მერქანი ადიგენის მუნიციპალიტეტის ტერიტორიაზეა დასაწყობებული: თუმცა ჯერ არ გვაქვს ჩაბარებული მიღება-ჩაბარების აქტით”.

კახიშვილის თქმით, მთავრობის გადასაწყვეტია ვის გადაეცემა აღნიშნული მასალა.

”გასულ წელსაც გვქონდა აქ დასაწყობებული მერქანი, რომელიც მთავრობის განკარგულების საფუძველზე სახელმწიფოს მიერ შეტანილ იქნა ბუფერულ ზონებში და დაურიგდათ ე.წ ლტოლვილებს. დღეის მდგომარეობით ჯერ არ არის მიღებული გადაწყვეტილება და აღნიშნული ხე-ტყის ბედი, ასე რომ როგორც კი სახელმწიფო გადაწყვეტილებას მიიღებს და ამაზე იმსჯელებს, ამის შემდეგ მოხდება მისი განკარგვა”, - ამბობს კახიშვილი.

[თამარ თოთაძე, ახალციხე]