შიდსით ინფიცირებულთა სტატისტიკა სამცხე–ჯავახეთში

ნამდვილად აქვს თუ არა სამივე პაციენტს აივ ინფექცია, დაავადებათა კონტროლისა და საზოგადოებრივი ჯანმრთელობის ეროვნული ცენტრის ახალციხის ლაბორატორიაში ჯერ ვერაფერს ამბობენ და პასუხს თბილისიდან ელოდებიან.

თუმცა, დადასტურებული სტატისტიკა აქვს ინფექციური პათოლოგიის, შიდსისა და კლინიკური იმუნოლოგიის სამეცნიერო–პრაქტიკულ ცენტრს. ცენტრის მონაცემებით, სამცხე–ჯავახეთში შიდსით ინფიცირებული 60 პაციენტია რეგისტრირებული.

2015 წლის 20 ნოემბრის მონაცემებით, საქართველოში, ინფექციური პათოლოგიის, შიდსის და კლინიკური იმუნოლოგიის ს.პ ცენტრში რეგისტრირებულია შიდსის ვირუსით ინფიცირების 5,331 შემთხვევა. ინფიცირებულთაგან 3,932 მამაკაცია, 1,399 ქალი. 2015 წელს 636 ახალი შემთხვევა გამოვლინდა, მაღალეფექტიან არვ მკურნალობაზე იმყოფება 2,615 პაციენტი, მათგან 46 ბავშვია.

„მართალია, მსოფლიო სტატისტიკით საქართველო მიეკუთვნება აივ ინფექცია/შიდსის დაბალი პრევალენტობის ქვეყნებს და, რაც კიდევ უფრო საინტერესოა, ამ ქვეყნებს შორისაც ერთ-ერთი ყველაზე ბოლო ადგილი უკავია, მაგრამ, მეორეს მხრივ, შიდსის ეპიდემიის კანონზომიერებიდან გამომდინარე, აივ ინფიცირებულების სავარაუდო რიცხვი საქართველოში 7000-ს უტოლდება. ეს კი ისეთი მცირერიცხოვანი ქვეყნისათვის, როგორიც საქართველოა, უკვე საკმაოდ სოლიდური რიცხვია“, – აცხადებენ შიდსის ცენტრში.



შიდსის ცენტრის ინფორმაციით, აივ ინფექციის გადაცემის გზებს შორის წამყვანია ნარკოტიკების ინექციური გზით მოხმარება (48.6%) და დაუცელი სქესობრივი კავშირები (50.2%), მათ შორის 7.6% ჰომოსექსუალური კავშირი.

შიდსთან ბრძოლის მსოფლიო დღე ყოველი წლის 1 დეკემბერს აღინიშნება. 2015 წლიდან გაეროს შიდსის პროგრამა ცდილობს შიდსს „დიდი ნაბიჯებით“ ებრძოლოს. „დიდი ნაბიჯებით შიდსის დამარცხებისკენ“ (On the Fast-Track to end AIDS) – ასე ჰქვია კამპანიას, რომელსაც ამბიციური გეგმა აქვს – 2030 წლისათვის ახალი ინფექციები რიცხვი არ აღემატებოდეს 200,000 წელიწადში. შეგახსენებთ, გასულ, 2014 წელს, მსოფლიოში შიდსით 2 მილიონი ადამიანი დაინფიცირდა.

[ნინო ნარიმანიშვილი, თინათინ ზაზაძე, ახალციხე]