„მოხარშული კვერცხი რომ გავტეხე, შიგნით შავი იყო“, – გვეუბნება „სათნოების სახლის“ ბენეფიციარი ლია ზედგინიძე.
სასადილოში გაფუჭებული კვერცხის შეტანაზე სხვა ბენეფიციარებიც საუბრობენ, თუმცა, ვინაობის გამჟღავნება არ სურთ. ისინი შიშობენ, რომ ხელმძღვანელობასთან პრობლემები შეექმნებათ.
„გარდა კვერცხისა, ხშირად გაფუჭებული თევზიც მოაქვთ, ძველია, სუნი აქვს და არ იჭმება. ქათმის ხორცი ძველი არასდროს ყოფილა, მაგრამ ძალიან შეამცირეს“, – ამბობს ლია ზედგინიძე, რომელიც აღნიშნულ სასადილოში გახსნის დღიდან იკვებება.
საწინააღმდეგოს აცხადებენ ის ბენეფიციარები, რომლებიც „სამხრეთის კარიბჭესთან“ ღიად საუბრობენ.
„რასაც აკეთებენ, ყველაფერი გემრიელია, თევზი ახლა უფრო უკეთესი შემოაქვთ, ვიდრე ადრე იყო“, – ამბობს ეკატერინე ქიმერიძე.
მას ეთანხმება ენძელა მურადოვი: „სამი წელია აქ ვიკვებები, კარგი საჭმელებია“.
გაფუჭებული კვერცხი, სათნოების სახლში ნამდვილად რომ შევიდა, ამას მზარეული რუსუდან ჭელიძეც გვიდასტურებს. მისი თქმით, როგორც კი შენიშნეს, რომ კვერცხი ძველი იყო, ბენეფიციარებს მის წაღებაზე უარი უთხრეს, თუმცა, ზოგმა მაინც წაიღო.
რაც შეეხება სხვა პროდუქტებს, რუსუდან ჭელიძე ამბობს, რომ მსგავსი ფაქტები არ ყოფილა: „ხუთი თვის განმავლობაში თითქმის ყოველ დღე გვაქვს უსიამოვნება. ეს ბენეფიციარები არ არიან კმაყოფილი ჩვენი მომსახურებით, და არა მარტო მომსახურებით. ნაწილს პური არ მოსწონს, ამბობენ, რატომ ღებულობთ „გორის“ პურსო.ზოგჯერ პური გამომცხვარია, ზოგჯერ ოდნავ დაუშუშავი, ზოგს პროტეზი აქვს, ზოგს თავისი კბილები. ამიტომ პურს გვირჩევენ, თან ზოგს უმარილო მოსწონს და ზოგს მარილიანი“.
ერთ–ერთმა ბენეფიციარმა, რომელმაც გაფუჭებული კვერცხი აიღო, ახალციხის მერიაში ჯანმრთელობისა და სოციალური დაცვის სამსახურის მთავარ სპეციალისტს სოციალური უზრუნველყოფის საკითხებში რუბენ კარაპეტიანს მიაკითხა. რუბენ კარაპეტანი გაფუჭებული კვერცხის მიტანას ადასტურებს, თუმცა, ოფიციალური კომენტარისგან თავს იკავებს.
ახალციხის მერის მოადგილე ზაზა თამარაშვილი კი აცხადებს, რომ პრობლემის შეტყობინებისთანავე რეაგირება მოახდინეს: „ყველაფერი მაშინვე აღმოიფხვრა“.
რას გულისხმობს „ყველაფრის მაშინვე აღმოფხვრა“, ააიპ „სათნოების სახლის“ დირექტორი ნათია მელიქიძე განმარტავს: „მომწოდებელმა მაშინვე შეგვიცვალა. ეს კვერცხი ბენეფიციარებისთვის არ მიგვიცია“.
გაფუჭებული პროდუქტი შპს „ნუცას“ წარმომადგენელმა დავით კაჭკაჭაშვილმა მართლაც მაშინვე შეცვალა. კაჭკაჭაშვილს „სამხრეთის კარიბჭე“ ვერ დაუკავშირდა, მისი მობილური ტელეფონი გამორთულია. შპს „სანში“, საიდანაც დავით კაჭკაჭაშვილს კვერცხი სასადილოში მიჰქონდა, ჯერ გვითხრეს, რომ მას „კიმუსის“ კვერცხი მიჰქონდა, თუმცა, მას შემდეგ რაც გაიგეს, რომ „სამხრეთის კარიბჭე“ ამბავს გაფუჭებული კვერცხის შესახებ არკვევდა, განაცხადეს, რომ კაჭკაჭაშვილს მათგან კვერცხი ორ თვეზე მეტია არ წაუღია: „ცხელა და უკვე ჩვენც აღარ შემოგვაქვს, სექტემბრიდან ისევ შემოვიტანთ“.
სათნოების სახლის ბენეფიციარები ამბობენ, რომ გაფუჭებული კვერცხი სასადილოში დაახლოებით ორი კვირის წინ მიიტანეს, დირექტორი კი აცხადებს, რომ ეს შემთხვევა ერთი თვის წინ იყო.
„არ ვიცი ასეთი აჟიოტაჟი რატომ ატყდა. ეს შემთხვევით მოხდა“, – ამბობს დირექტორი და კატეგორიულად გამორიცხავს სხვა პროდუქტების კლებას, – . „მას შემდეგ რაც ჩვენ ვმუშაობთ, მენიუში დიდი ცვლილებები არ შესულა. ძველი მენიუთი ბენეფიციარები კმაყოფილები იყვნენ და თითქმის არაფერი შეგვიცვლია“.
[თამუნა უჩიძე, ახალციხე]