2014 წელს 2013 წელთან შედარებით ვირუსული C ჰეპატიტის შემთხვევები 644-ით გაიზარდა

2015 წლის აპრილიდან საქართველოში სახელმწიფო პროგრამა დაიწყო, სახელწოდებით: „საქართველო C ჰეპატიტის გარეშე“. 21 აპრილს, თბილისში, საქართველოს მთავრობასა და ამერიკულ ფარმაცევტულ კომპანია "გილეადს" შორის ხელი მოეწერა მემორანდუმს, რომელიც საქართველოს მოქალაქეებისთვის C ჰეპატიტის ახალი პრეპარატით ხელმისაწვდომ მკურნალობას ითვალისწინებს. 28 აპრილს კი C ჰეპატიტის სამკურნალო სახელმწიფო პროგრამაში პაციენტების რეგისტრაცია დაიწყო.

ინფორმაციის თავისუფლების განვითარების ინსტიტუტი C ჰეპატიტით დაავადებულთა სტატისტიკური მონაცემებით დაინტერესდა. როგორც ორგანიზაციაში აცხადებენ, C ჰეპატიტით ინფიცირებულთა რაოდენობის, შესახებ ინსტიტუტის მოთხოვნაზე სამინისტროდან მიწოდებულია ინფორმაცია, მხოლოდ დარეგისტრირებული ახალი შემთხვევების შესახებ. როგორც მიღებული დოკუმენტაციიდან ირკვევა 2013-14 წლებში დაფიქსირდა სულ 4 690 ახალი შემთხვევა. 2014 წელს 2013 წელთან შედარებით ვირუსული C-ჰეპატიტის ახალი შემთხვევები 644-ით არის მომატებული.

„გასულ წლებში (კერძოდ, 2012 წელს) IDFI-სთვის მოწოდებული ინფორმაციის მიხედვით, 2008 წელს ჩატარდა კვლევა, რომლის მიხედვითაც საქართველოს მოზრდილ მოსახლეობაში დაახლოებით 200 000 ადამიანია ვირუსული C-ჰეპატიტით ინფიცირებული. მხოლოდ ახალი შემთხვევების შესახებ ინფორმაციის მოწოდება მიგვანიშნებს იმაზე, რომ დღემდე არ არსებობს ოფიციალური მონაცემები საქართველოში აღნიშნული ვირუსით ინფიცირებულთა ზუსტი რაოდენობის შესახებ“, – აცხადებენ ორგანიზაციაში.

საქართველოს შრომის, ჯანმრთელობისა და სოციალური დაცვის სამინისტროს ვებ-გვერდზე მოცემული ინფორმაციის მიხედვით C ჰეპატიტის მართვის სახელმწიფო პროგრამის პირველი ეტაპის ღონისძიებები გულისხმობს C ჰეპატიტით დაავადებულ პირთა დიაგნოსტიკას მკურნალობაში ჩართვამდე, მკურნალობის პროცესის მონიტორინგისთვის აუცილებელი კვლევების ჩატარებას და C ჰეპატიტით დაავადებულ პირთა მკურნალობას სპეციალური სამკურნალო მედიკამენტებით.

„საქართველოში C ჰეპატიტის მკურნალობა საწყის ეტაპზეა და გარკვეული წარმატებები არსებობს. C ჰეპატიტის სამკურნალო სახელმწიფო პროგრამა, რომელიც საქართველოს მოქალაქეებს საშუალებას აძლევს ისარგებლონ ხშირ შემთხვევაში მათთვის ხელმიუწვდომელი მკურნალობით, მნიშვნელოვან შედეგს იქონიებს C ჰეპატითით ინფიცირებულთა რაოდენობის შემცირების თვალსაზრისით“, – აცხადებენ ინფორმაციის თავისუფლების განვითარების ინსტიტუტში.

[ნინო ნარიმანიშვილი, ახალციხე]