C ჰეპატიტის მკურნალობის მსურველთათვის რეგისტრაცია იწყება

საქართველოს ჯანდაცვის სამინისტროს ინფორმაციით, მოქალაქეებმა შესაბამისი დოკუმენტაცია სოციალური მომსახურების სააგენტოს რაიონულ ცენტრებსა და ცენტრალურ ოფისში უნდა წარადგინონ, ხოლო რეგიონებში სოციალური მომსახურების სააგენტოს სამხარეო ცენტრებში, რომლებიც ქუთაისში, ზუგდიდში, ოზურგეთში, თელავში, ახალციხეში, გორში, რუსთავში, ამბროლაურსა და ბათუმში მდებარეობს.

"დოკუმეტაციაში წარმოდგენილ უნდა იყოს : პირადობის მოწმობის ასლი, ფორმა 100, ბოლო პერიოდში ჩატარებული დიაგნოსტიკური კვლევები - HCV- რნმ-ის რაოდენობრივი, გენეტიკური ტიპის, ღვიძლის ფიბროზის ხარისხის კვლევები, ასევე სისხლის საერთო ანალიზი, ALT, AST, HbsAg, anti-HBs,G-GT, ტუტე ფოსფატაზა, ბილირუბინი (პირდაპირი და საერთო), კრეატინინი, გლუკოზა, ალბუმინი, INR, ANA, TSH, მუცლის ღრუს ულტრაბგერითი გამოკვლევა", – ნათქვამია ჯანდაცვის სამინისტროს განცხადებაში.

უწყების ინფორმაციით, პირველ ეტაპზე პროგრამას 3 კლინიკა ემსახურება: 1.ინფექციური პათოლოგიის, შიდსისა და კლინიკური იმუნოლოგიის ცენტრი(ალ.ყაზბეგის 16). 2.„ჰეპა“ (ლუბლიანას 18/20),3. „ნეოლაბი“- (ნუცუბიძის ქ. 8). დოკუმენტაციისათვის საჭირო ფორმა 100 პაციენტებმა სწორედ ამ კლინიკებიდან უნდა წარადგინონ.

როგორც ჯანდაცვის სამინისტროში აცხადებენ, პროგრამას სხვა კლინიკებიც შეუერთდებიან, მათ შორის რეგიონებშიც.

"პირველ ეტაპზე პროგრამაში ჩაერთვებიან პაციენტები, რომელთა ღვიძლის მდგომარეობა რთულია და აკმაყოფილებენ პროგრამის პირველ ეტაპზე ჩასართავ კრიტერიუმებს. კომისია, რომელიც განსაზღვრავს მოხვდება თუ არა პაციენტი პროგრამის პირველ ეტაპზე მიმდინარე კვირაში შეიკრიბება", – ნათქვამია განცხადებაში.

ჯანდაცვის სამინისტროს საჭირო დოკუმენტაციის ნუსხას და კლინიკების შესახებ ინფორმაციას სამინისტროს ვებ-გვერდზე- WWW.MOH. GOV.GE განათავსებს.

[sknews.ge]