ხელმოწერა, ბეჭედი და ... – ახალციხის მერიაში ახალგაზრდული საბჭო დაფუძნდა [ბლოგი]

საქართველოს ორგანული კანონის „ადგილობრივი თვითმმართველობის კოდექსის“ 54–ე მუხლის პირველი პუნქტის ე.ე და ე.ვ. ქვეპუნქტების თანახმად, შეიქმნას ახალციხის მუნიციპალიტეტის მერის სათათბირო ორგანო „ახალგაზრდული საბჭო“, შემდეგი შემადგენლობით.... – წერია ახალციხის მერიის 2015 წლის 25 მარტის N188 ბრძანებაში.

ბრძანებასა და ამავე დოკუმენტს დართულ დებულებას ახალციხის მერმა გიორგი კოპაძემ საინიციატივო ჯგუფის წევრებთან მეორე შეხვედრისას, 2015 წლის 2 აპრილს, ხელი საზეიმოდ მოაწერა.

ხელმოწერამდე იყო ერთსაათიანი მსჯელობა ქალაქის მნიშვნელოვანი პრობლემის, მიუსაფარი ძაღლების საკითხზე. ამ თემაზე მუშაობა ახალგზრდებმა მას შემდეგ დავიწყეთ, რაც ახალციხის მერთან პირველი შეხვედრა გავმართეთ და ქალაქის პრობლემებზე ვიმსჯელეთ.

სამუშაო ბევრი იყო, მზადებაც ნაადრევად დავიწყეთ. თავდაპირველად ქალაქში არსებული მდგომარეობის შესახებ ვიდეობლოგი მოვამზადეთ. ბლოგში ნაჩვენებია, რა ხდება ამ კუთხით ახალციხეში და რაში ხედავენ ადგილობრივები გამოსავალს.

ვიდეობლოგი – რა ხდება ქალაქში



ამის შემდეგ უკვე იმაზე დავიწყეთ მუშაობა, რა ხდება საქართველოს ქალაქებში. აღმოჩნდა, რომ ეს პრობლემა საქართველოს ყველა დიდ ქალაქს აწუხებს, მოგვარებული კი, ისიც ნაწილობრივ, მხოლოდ რამდენიმე ქალაქს აქვს.

პრეზენტაციის შემდეგ მოულოდნელად ახალციხის მერმა გიორგი კოპაძემ განაცხადა, რომ ყველა დოკუმენტი მზად აქვს და ახალგაზრული საბჭოს შესახებ ბრძნებასა და დებულებას ხელი მოაწერა.

ახალციხე პირველი ქალაქია, სადაც ახალგაზრდული საბჭო დაფუძნდა. გვეამაყება, რომ ჩვენ ამ საბჭოს პირველი მერცხლები ვართ. ეს დიდი პატივია და ამავე დროს, დიდი პასუხისმგებლობაც, როგორ გააგრძელებს ეს საბჭო მომავალში მუშაობას, სწორედ იმაზეა დამოკიდებული, როგორ ვიმუშავებთ ჩვენ, ახალციხის მერის პირველი სათათბირო ორგანო.

„დღეს ჩემთვის განსაკუთრებული დღეა - ახალციხის მერმა, ბატონმა გიორგი კოპაძემ თავისი სათათბირო ორგანო - ახალგაზრდული საბჭო დააფუძნა. ეს ნიშნავს, რომ ჩვენი ნახევარი წლის შრომა დაფასდა; ეს ნიშნავს, რომ თვითმმართველობის რეფორმა ძალაში შედის; ეს ნიშნავს, რომ ახალგაზრდების ხმას უსმენს გადაწყვეტილების მიმღები პირი; ეს ნიშნავს, რომ მერის და მოსახლეობის ურთიერთობის ინსტიტუციონალიზება შესაძლებელია ყოველგვარი "ჩემიანი" - "სხვისიანის" პარადიგმის გარეშე; ეს ნიშნავს, რომ მართლა უკეთეს ქვეყანაში ვცხოვრობთ, იმის მიუხედავად, რამდენად თვალსაჩინოა ეს პროცესი“, – საბჭოს დაფუძნება ასე პროექტის „ახალგაზრდული საბჭოს დაფუძნება“ ხელმძღვანელმა, ია ანთაძემ შეაფასა.

ვიდეობლოგი მერთან შეხვედრისა და საბჭოს დაფუძნების შესახებ



და ბოლოს, ტრადიციული, ე.წ. სელფის გარეშე, არც ეს შეხვედრა დასრულებულა.



[ბლოგის ავტორები:
საბჭოს წევრები – ელისაბედ მოდებაძე, ალექსანდრე ბერიძე]

ბლოგი მომზადებულია პროექტის „მერის სათათბირო ორგანოს - ახალგაზრდული საბჭოს დაფუძნება“ ფარგლებში. პროექტს მხარს უჭერს სსიპ საარჩევნო სისტემების განვითარების, რეფორმებისა და სწავლების ცენტრი