დაუბეგრავი მინიმუმის მისაღებად რეგისტრაცია დაიწყო

დაუბეგრავი მინიმუმით სარგებლობის უფლება იმ მოქალაქეებს აქვთ, ვისაც 2014 წელს ხელფასის სახით 1 800–დან 6 000 ლარამდე აქვთ აღებული. მოცემულ შემთხვევაში მოქალაქეს უფლება აქვს დაიბრუნოს 360 ლარი, ხოლო თუ ხელფასის ოდენობა 1 800 ლარზე ნაკლებია, მაშინ მოქალაქეს კონკრეტული თანხის 20 პროცენტი დაუბრუნდება.

შემოსავლების სამსახურის ინფორმაციით, დაუბეგრავი მინიმუმის მისაღებად მოქალაქეებს დეკლარაციის შევსება პირველი აპრილიდან 30 სექტემბრის ჩათვლით შეუძლიათ.

"პირადი ნომრის მითითებით უნდა გაარკვიოთ, სარგებლობთ თუ არა დაუბეგრავი მინიმუმის გამოქვითვის უფლებით, შემდეგ შეავსოთ ელექტრონული დეკლარაცია და შეიტყოთ თქვენთვის დასაბრუნებელი თანხის ოდენობა. თუ თქვენ არ მიეკუთვნებით დაუბეგრავი მინიმუმით მოსარგებლე პირთა კატეგორიას, დეკლარაციაში პირადი ნომრის მითითების შემდგომ ვეღარ განაგრძობთ დეკლარაციის შევსებას და ამის შესახებ სისტემა გაცნობებთ", - ნათქვამია განცხადებაში, რომელიც შემოსავლების სამსახურმა გაავრცელა.

განცხადების თანახმად, დეკლარირება შესაძლებელია ინტერნეტის საშუალებით ან/და მითითებული საბანკო დაწესებულების მეშვეობით.

"ელექტრონული დეკლარაციის წარდგენის შემდგომ, თქვენ მიერ დეკლარაციაში მითითებულ საბანკო ანგარიშზე, დაგიბრუნდებათ დაუბეგრავი მინიმუმის შესაბამისი თანხა "დაუბეგრავი მინიმუმის გამოქვითვის შესახებ" დეკლარაციის რეგისტრაციიდან სამი თვის განმავლობაში. ამასთან, თუ თქვენ 2013 კალენდარული წლის მიხედვით ხელფასის სახით მიღებულ შემოსავალზე არ გისარგებლიათ დაუბეგრავი მინიმუმის გამოქვითვის უფლებით, შეგიძლიათ მიმართოთ შემოსავლების სამსახურს, არაუგვიანეს 2015 წლის 30 სექტემბრისა", - ნათქვამია განცხადებაში.

დამატებითი ინფორმაციის მიღების მიზნით, შეგიძლიათ, დაუკავშირდეთ შემოსავლების სამსახურის სატელეფონო ცენტრს შემდეგ ნომერზე: (995 32) 22 99 299 ან, მიმართოთ ელექტრონულ ფოსტაზე - info@rs.ge. ასევე, შეგიძლიათ, გაეცნოთ შემოსავლების სამსახურის ვებვერდზე - www.rs.ge განთავსებულ ხშირად დასმულ კითხვებს.

[sknews.ge]