სოფელ ოშორაში 46 წლის მამაკაცი მოკლეს

ადგილობრივების განმარტებით, გარდაცვლილი და ბრლადებული გუშინ ბრალდებულის ოჯახში ერთად ქეიფობდნენ. ნასმებს შელაპარაკება მოუხდათ. მასპინძელმა სტუმარი ნაჯახის ჩარტყმით მოკლა, შემდეგ კი, კვალის დაფარვის მიზნით, მისი დამარხვა სცადა.

აღნიშნულ ინფორმაციას საქართველოს შინაგან საქმეთა სამინისტროში ადასტურებენ. სამინისტროს საზოგადოებასთნ ურთიერთობის სამსახურში განმარტავენ, რომ სამცხე-ჯავახეთის სამხარეო მთავარი სამმართველოს თანამშრომლებმა მკვლელობის ფაქტი გახსნეს. სამართალდამცველებმა 1981 წელს დაბადებული, წარსულში ნასამართლევი ზვიად ბ. განზრახ მკვლელობის ბრალდებით დააკავეს.

"გამოძიებამ დაადგინა, რომ ბრალდებულმა მიმდინარე წლის 13 იანვარს, ასპინძის რაიონის სოფელ ოშორაში, ურთიერთშელაპარაკებისას, ცივი იარაღის გამოყენებით, 1969 წელს დაბადებული ფრიდონ მ. მოკლა, ცხედარი მდინარის ნაპირზე წაიღო და მის დამარხვას აპირებდა. სამართალდამცველებმა ზვიად ბ. ჩატარებული ოპერატიულ-სამძებრო ღონისძიებების შედეგად მკვლელობიდან რამდენიმე საათში, სოფელ ოშორას გასასვლელში დააკავეს. დაკავებული აღიარებს ჩადენილ დანაშაულს", -აცხადებენ შსს–ში.

შსს–ს ინფორმაციით, გამოძიება განზრახ მკვლელობის ფაქტზე, სსკ-ს 108-ე მუხლით მიმდინარეობს.

[თამუნა უჩიძე, ახალციხე]