სამცხე–ჯავახეთში სასწრაფო დახმარების სამსახურის ავტოპარკი განახლდა

სასწრაფო დახმარების ავტომობილების გადაცემის ცერემონია დღეს, 17 დეკემბერს ადმინისტრაციული შენობის წინ გაიმართა. ღონისძიებას სასწრაფო სამედიცინო დახმარების ცენტრის დირექტორი თეიმურაზე ხარაშვილი, დირექტორის მოადგილე გიორგი შათირიშვილი, მხარის გუბერნატორი აკაკი მაჭუტაძე და ადგილობრივი მუნიციპალიტეტების გამგებლები ესწრებოდნენ.

როგორც სასწრაფო სამედიცინო დახმარების ცენტრის დირექტორი თეიმურაზ ხარაშვილი ამბობს, სამცხე–ჯავახეთში ავტოპარკინგი 100 პროცეტით განახლდა.

„პირველ ეტაპზე რეგიონში სამი მანქანა გამოვაგზავნეთ, ახლა კიდევ ათი დავამატეთ. გარდა ამისა, დაგეგმილია მედ–პერსონალისთვის მეცამეტე ხელფასის გაცემა და მომავალი წლიდან ხელფასის 30–პროცენტიანი მატება. ახალი წლიდან მედ–პერსონალი ახალი ფორმებით შეუდგება მუშაობას“, – ამბობს თეიმურაზ ხარაშვილი.

ახალციხის სასწრაფო დახმარების რაიონულ ცენტრს 2 მაღალი გამავლობის ავტომობილი გადაეცა, ბორჯომის სასწრაფო სამედიცინო დახმარების ცენტრს სამი მაღალი და ერთი საშუალო გამავლობის ახალი მანქანა, ადიგენს ორი მაღალი გამავლობის მანქანა, ასპინძისა და ახალქალაქის სასწრაფო დახმარების რაიონულ ცენტრებს კი თითო–თითო მაღალი გამავლობის მანქანა გადაეცათ.

აკაკი მაჭუტაძის თქმით, სამცხე–ჯავახეთში ავტოპარკინგის განახლება ჯანდაცვის მომსახურების ხარისხს გააუმჯობესებს.

„სასწრაფო დახმარების ავტოპარკი, რომელიც, ბოლო 10 წლის განმავლობაში არ განახლებულა, მთლიანად განახლდა“, – ამბობს აკაკი მაჭუტაძე.

სასწრაფო სამედიცინო დახმარების ცენტრის ავტოპარკის განახლება 29 ოქტომბრიდან დაიწყო. ამ დრომდე, რეგიონებში 104 ახალი, საერთაშორისო სტანდარტების შესაბამისი, სამედიცინო წესით აღჭურვილი მანქანა განაწილდა.

[მანანა სარაშვილი, ახალციხე]