სამცხე–ჯავახეთის გუბერნატორის საჩუქარი შშმ პირებს

სამცხე–ჯავახეთის გუბერნატორის მოადგილემ ავთანდილ კაჭკაჭიშვილმა და სამხარეო ადმინისტრაციის წარმომადგენლებმა ახალციხეში მცხოვრები შეზღუდული შესაძლებლობის მქონე პირები მოინახულეს და საჩუქრად ინვალიდის ეტლები გადასცეს.

"გუბერნატორს აჩუქეს ეს ეტლები და მან გადაწყვიტა, რომ შეზღუდული შესაძლებლობის მქონე პირებისთვის გადაეცა. თუ საშუალება იქნება, ჩვენ კიდევ სიამოვნებით დავეხმარებით გაჭირვებულ მოსახლეობას", – ამბობს ავთანდილ კაჭკაჭიშვილი.

მისივე თქმით, ეტლები იმ ადამიანებს გადაეცათ, ვისაც ამ ეტაპზე ყველაზე მეტად სჭირდებოდათ.

"ზუსტად ერთი წლის წინ ჩემს მეუღლეს თურქეთში მანქანა დაეჯახა, მოვიარეთ მთელი ახალციხე და ეტლი ვითხოვეთ, მაგრამ იმდენად უვარგისი იყო, რომ გადაადგილებას ვერ ვახერხებდით. ეს საჩუქარი ელემენტარული არ არის ჩვენთვის, ახლა თავისუფლად შემეძლება, რომ ეზოში ჩავიყვანო ან გარეთ გავიყვანო და მოსახლეობასთან ურთიერთობა ჰქონეს", – ამბობს აკაკი გელაშვილის მეუღლე ლია ბედნარსკი.



[თამარ თოთაძე, ახალციხე]